വിശ്വാസങ്ങൾ കൊണ്ടും അത്ഭുതങ്ങൾ കൊണ്ടും രാമേശ്വരത്തെത്തുന്ന സഞ്ചാരികളെയും സന്ദർശകരെയും അതിശയിപ്പിക്കുന്ന ഇടം…

കടലിലേക്കിറങ്ങി സ്ഥിതി ചെയ്യുന്ന ഉറവയായിരുന്നിട്ടും അതിൽ നിന്നും കിട്ടുന്ന ശുദ്ധജലമാണ് ഇവിടേക്ക് വിശ്വാസികളെ ആകർഷിക്കുന്ന കാരണങ്ങളിലൊന്ന്. രാമേശ്വരത്തെ പ്രധാന കാഴ്ചകളിൽ ഒരിക്കലും വിട്ടുപോകരുതാത്ത വില്ലൂണ്ടി തീർഥത്തിനെക്കുറിച്ച് വായിക്കാം.

രാമേശ്വരം

സ്ഥലങ്ങൾ കാണുവാനുള്ള ഒരു യാത്ര എന്നതിലുപരി രാമേശ്വരത്തേയ്ക്കുള്ള ഓരോ യാത്രയും ഓരോ തീർഥാടനം തന്നെയാണ്.

രാമന്റെ പാദസ്പർശമേറ്റു പുണ്യം ചെയ്ത മണ്ണിലൂടെയുള്ള ഓരോ കാലടിയും വിശ്വാസത്തിലേക്കു കൂടുതൽ എത്തിച്ചേരുവാനുള്ള പാഥേയമാണ് വിശ്വാസികൾ കരുതുന്നത്‌.

ചാർദാം തീർഥാടന കേന്ദ്രങ്ങളിലൊന്നു കൂടിയായ ഇവിടം കേരളത്തിൽ നിന്നും രണ്ടു ദിവസം കൊണ്ടു പോയി വരുവാൻ സാധിക്കുന്ന ഇടം കൂടിയാണ്.

വില്ലൂണ്ടി തീർഥം

രാമേശ്വരം തീർഥാനനത്തിൽ ഒരാൾ ഏറ്റവും അധികം തവണ കടന്നു പോകുന്നത് ഇവിടുത്തെ തീർഥങ്ങളിലൂടെയാണ്.

രാമൻ ദാഹമകറ്റുവാനായി കുഴിച്ച തീർഥക്കുളം മുതൽ രാവണനെ നിഗ്രഹിച്ചതിനു ശേഷം കുളിച്ച തീർഥം വരെ രാമേശ്വരം നഗരത്തിനു ചുറ്റുമായി കാണാം. അതിൽ ഏറ്റവും പ്രധാനപ്പെട്ട ഒന്നാണ് വില്ലൂണ്ടി തീർഥം.

കടലിലെ ശുദ്ധജലം ലഭിക്കുന്ന തീര്‍ഥം
കടൽക്കരയ്ക്ക് സമീപം നിന്നിരുന്ന സമയത്ത് കഠിനമായ ദാഹം അനുഭവപ്പെട്ട സീതയുടെ ദാഹം ശമിപ്പിക്കുവാനായി രാമൻ മധുരമുള്ള വെള്ളം എടുത്തു കൊടുത്ത ഇടമാണ് വില്ലൂണ്ടി തീർഥം എന്നറിയപ്പെടുന്നത്.

കടലിലേക്കിറങ്ങി സ്ഥിതി ചെയ്യുന്ന ഒരു ചെറിയ തീർഥക്കുളമാണിത്. അതുകൊണ്ടു തന്നെ ഇവിടെ നിന്നും ഉപ്പുകലർന്ന വെള്ളമാണ് ലഭിക്കുന്നതെന്ന് വിചാരിച്ചാൽ തെറ്റി.

ഉപ്പിന്റെ അംശം തെല്ലുപോലും അനുഭവപ്പെടാത്ത ശുദ്ധ ജലമാണ് ഇവിടെ നിന്നും ലഭിക്കുന്നത്.
സീതയെ രാവണന്റെ ലങ്കയിൽ നിന്നും രക്ഷപെടുത്തിയത് ശേഷം രാമനും കൂട്ടരും രാമേശ്വരത്തെത്തി വിശ്രമിച്ചുവെന്നും ഇവിടെ ശിവലിംഗം സ്ഥാപിച്ച് പൂജകൾ നടത്തിയെന്നുമാണ് വിശ്വാസം.

ഇവിടുത്തെ തീർഥങ്ങളിൽ നിന്നും ശുദ്ധി വരുത്തിയതിന് ശേഷം അവർ അയോധ്യയ്ക്ക് തിരികെ പോയി എന്നും വിശ്വസിക്കപ്പെടുന്നു. അതിനു മുൻപായി ദാഹം അനുഭവപ്പെട്ട രാമന്റെ ആളുകൾ അദ്ദേഹത്തോട് സങ്കടം ഉണർത്തിച്ചുവെന്നും രാമൻ തന്റെ വില്ലു കുലച്ച് മണ്ണിൽ ഒരു തീര്‍ഥം സൃഷ്ടിച്ച് അവർക്ക് നല്കിയെന്നും വില്ലൂണ്ടിയെക്കുറിച്ച് പറയുന്നത്.

വില്ലൂണ്ടി എന്നാൽ മണ്ണിൽ വില്ല് ആണ്ടിറങ്ങിയ ഇടം എന്നാണ് അർഥം.

The post ശാസ്ത്രത്തിനു വിശദീകരിക്കാനാവാത്ത കടലിലെ വില്ലൂണ്ടി തീർഥം… appeared first on top1kerala.

മേത്തൻമണി

1840ൽ അന്നത്തെ മഹാരാജാവായിരുന്ന സ്വാതി തിരുനാളിന്റെ ഭരണകാലത്ത് തിരുവനന്തപുരം വാനനിരീക്ഷണകേന്ദ്രത്തിന്റെ സ്ഥാപക ഡയറക്ടർ ആയിരുന്ന ജോൺ കാൽഡിക്കോട്ട് മദിരാശിയിലെ ചിന്നപട്ടണത്തു നിന്നും രണ്ടു വലിയ നാഴിക മണികൾ വാങ്ങി.

അതിലൊന്ന് അന്നത്തെ തിരുവിതാംകൂറിന്റെ ആസ്ഥാനമായിരുന്ന പത്മനാഭപുരം കൊട്ടാരത്തിലും (തമിഴ്‌നാട്ടിലെ തക്കലയ്ക്കടുത്തു) മറ്റൊന്ന് തിരുവനന്തപുരത്ത് പത്മനാഭ ക്ഷേത്രത്തിലും സ്ഥാപിച്ചു.

പത്മ തീർത്ഥകുളത്തിന് തെക്ക് ഭാഗത്തെ നെടുനീളത്തിലുള്ള ഇരുനില മാളികയാണ് കരുവേലപ്പുര എന്ന പഴയ സെക്രട്ടറിയേറ്റ്. അവിടെയാണ് മേത്തൻമണി സ്ഥാപിച്ചത്

പത്മതീര്‍ത്ഥകുളത്തിനഭിമുഖമായി ഇന്നും തലയുയര്‍ത്തി നില്‍ക്കുന്ന ഈ ചരിത്രസ്മാരകം, ധര്‍മ്മരാജയുടെ ഭരണകാലത്ത് ടിപ്പുവിന്റെ അധിനിവേശത്തെ ചെറുത്തു തോല്‍പ്പിച്ചതിന്റെ ഓര്‍മ്മയായിട്ടാണ് ഈ മണിയെ കരുതി പോരുന്നത്.

മേത്തന്‍ മണിയുടെ പ്രവര്‍ത്തനം

പ്രത്യേക തരം ചെമ്പുതകിടിലാണ് ഈ മേത്തൻ മണി നിർമ്മിച്ചിരിക്കുന്നത്. ഡയലിന്റെ തൊട്ടു മുകളിലായി മഹാഗണിത്തടിയില്‍ പണിക്കഴിപ്പിച്ച, ഓരോ മണിക്കൂറിലും വായ്‌ തുറക്കുന്ന താടിക്കാരന്‍ മേത്തന്റെ രൂപവും അയാളുടെ മുഖത്തേക്ക് ഇരു വശത്തു നിന്നും ആഞ്ഞിടിക്കുന്ന രണ്ടു മുട്ടനാടുകളുമാണ് ഈ മണിയെ കൗതുകപൂര്‍ണ്ണമാക്കുന്നത്.

ഇത് വഞ്ചിയൂര്‍ നിന്നും വന്ന കുളത്തൂക്കാരന്‍ എന്ന് പേരുള്ള ആശാരി പിന്നീട് പണിത് ചേര്‍ത്തതാണ് എന്ന് പറയപ്പെടുന്നു. അദ്ദേഹത്തെ ഈ നിര്‍മ്മിതിയുടെ പേരില്‍ ആദരസൂചകമായി ‘സൂത്രം ആശാരി’ എന്ന് വിളിച്ചിരുന്നതായും തദ്ദേശവാസികള്‍ പറയുന്നു.

ആബാലവൃദ്ധം ജനങ്ങള്‍ ഈ അത്ഭുതകാഴ്ച കാണാന്‍ അന്നൊക്കെ ക്ഷേത്രമുറ്റത്ത് തടിച്ചു കൂടിയിരുന്നതായി അറിയുന്നു.

പഴയ ചാട് സമ്പ്രദായമാണ് ഈ സൂത്രത്തിന്റെ പ്രവര്‍ത്തനത്തിന്നാധാരം. നാഴികമണിയുടെ സൂചികളില്‍ രണ്ടു ഭാരക്കട്ടികള്‍ തൂക്കിയിട്ടുണ്ട്. അതിനെ ക്ലോക്കിന്റെ പുറകില്‍ ഒരു ദണ്ഡുമായി ഘടിപ്പിച്ചു വച്ചിട്ടുണ്ട്.

സൂചികള്‍ ഒരു വട്ടം ചുറ്റി വരുമ്പോള്‍ ഇതിലെ ഈ പ്രത്യേക ലിവര്‍ സംവിധാനം അനുസരിച്ച് ദണ്ഡ് ചലിക്കും, ഭാരമയയും. തല്‍ഫലമായി രണ്ടു മുട്ടനാടുകളും അടുത്തു വന്നു താടിരൂപത്തില്‍ ഇടിക്കും.

ആദ്യകാലത്ത്, ഘടികാരത്തിന്റെ പ്രവര്‍ത്തനത്തിനുസൃതമായി ഓരോ മണിക്കൂര്‍ ഇടവിട്ട്‌ സമയക്ലിപ്തയോടെ മണിയടിക്കാന്‍ പ്രത്യേകം സേവകരെ ചട്ടം കെട്ടിയിരുന്നു.

മണിഗോപുരത്തിന്റെ താഴെ നിലയില്‍ നിലയുറപ്പിച്ചിരുന്ന കൂറ്റന്‍ ലോഹമണിയില്‍ മുട്ടിയാണ് അന്ന് ജനങ്ങളെ സമയമറിയിച്ചിരുന്നത്.

മേത്തന്‍ അഥവാ മ്ലേച്ചന്‍ എന്നാ വാക്കില്‍ നിന്നാവണം മേത്തന്‍മണിയെന്ന പേരിന്റെ ഉത്ഭവം. സംസ്കൃതത്തില്‍ ഈ വാക്കിന് ആര്യനല്ലാത്തവന്‍, സാമ്പ്രദായിക ഹിന്ദു ആചാരങ്ങള്‍ പാലിക്കാത്തവന്‍, മത്സ്യമാംസാദികള്‍ ഭുജിക്കുന്നവന്‍ എന്നൊക്കെ വിവക്ഷ കാണുന്നുണ്ട്.

ടിപ്പുവിനെ മേത്തനായി കണക്കാക്കിയിരുന്നതു കൊണ്ടാവണം ടിപ്പുവിന്മേലുള്ള വിജയത്തെ അനുസ്മരിപ്പിക്കുന്ന ഈ നാഴികമണിയെ മേത്തന്‍ മണി എന്ന പേരില്‍ വിളിച്ചു പോന്നത്.

വര്‍ഷങ്ങള്‍ ഇത്ര കഴിഞ്ഞിട്ടും വാര്‍ദ്ധക്യത്തിന്റെ ബാലാരിഷ്ടതകളില്ലാതെ ഇന്നും ചുറുചുറുക്കോടെ ഓടിക്കൊണ്ടിരിക്കുന്നു ഈ നാഴിക മണി.

നഗരം വളര്‍ന്നു വലുതായിട്ടും ഇന്നും മേത്തന്‍ മണിയുടെ നാഴികമുട്ട് ഓരോ മണിക്കൂറിലും ഇടവിട്ട്‌ കേള്‍ക്കാന്‍ അനന്തപുരിയിലെ പഴമക്കാര്‍ കാതോര്‍ക്കാറുണ്ട്.

അതെ, ആ ലോഹനാദം അവരുടെ ശീലത്തിന്റെ ഭാഗമായിരിക്കുന്നു.

The post ടിപ്പുവിന്റെ അധിനിവേശത്തെ ചെറുത്തു തോല്‍പ്പിച്ചതിന്റെ സ്മരണയിൽ മേത്തൻ മണി. appeared first on top1kerala.

കർണാടകയിലെ ഷിരൂരിൽ ജൂലൈ 16ന് മണ്ണിടിച്ചിലിൽ കാണാതായ കോഴിക്കോട് സ്വദേശി അർജ്ജുനു വേണ്ടിയുള്ള തിരച്ചിലിന് സഹായത്തിനും മുന്നിലുള്ളത് ഈ മാൽപേ സ്വദേശി ഈശ്വറാണ്.

മുങ്ങൽ വിദഗ്ധനും മത്സ്യത്തൊഴിലാളിയുമായ ഈശ്വർ, ഗംഗാവലിപ്പുഴയിലെ കുത്തൊഴുക്കിനെ വകവയ്ക്കാതെ പല ദിവസങ്ങളായി മണിക്കൂറുകളോളം ആണ് പുഴയുടെ ആഴങ്ങളിൽ അർജ്‌ജുനെ തെരഞ്ഞത്.

ചൊവ്വാഴ്ചയിലെ തിരച്ചിലിനൊടുവിൽ ഒരു ട്രക്കിന്റെ അധികം പഴക്കമില്ലാത്ത ഹൈഡ്രോളിക് ജാക്കി കണ്ടെത്തി. അർജ്ജൂൻ ഓടിച്ച ലോറിയുടേതാണ് ഈ ജാക്കി എന്ന് ലോറിയുടമ മനാഫ് പറയുന്നു.

ദൗത്യം ഉടൻ കരയ്ക്കടുക്കും എന്ന പ്രതീക്ഷയ്ക്ക് ബലം നൽകുന്നതും ഈശ്വർ മാല്പയാണ്

. അടിയൊഴുക്കിൽ പതറാതെ മാൽപെ

വെള്ളത്തിൻ്റെ സ്വഭാവവും ഭാവവും കൈവെള്ള പോലെ പഠിച്ച ആളാണ് മാൽപെ. കർണാടകയിലെ ബംഗളൂരു, ചിക്കമംഗളുരു, കോലാർ, ബെലഗാവി, ദണ്ഡേലി തുടങ്ങിയ സ്ഥലങ്ങളിലെ ജലാശയങ്ങളിൽ നിന്ന് 20 വർഷമായി നിരവധി പേരെയാണ് മാൽപേ രക്ഷിച്ചത് .

ആയിരത്തോളം അവശിഷ്ടങ്ങളും കണ്ടെടുത്തു ഇതിൽ ഡ്രോണുകൾ, മൊബൈൽ ഫോണുകൾ, മൃതദേഹങ്ങൾ എന്നിവയെല്ലാമുണ്ട്.

വെള്ളത്തിനടിയിലെ സാഹസികത മാൽപെയുടെ വിനോദമല്ല, മറിച്ച് സമൂഹത്തോടുള്ള കടപ്പാടാണ്. ഷിരൂരിലെ മണ്ണടിച്ചിലിൽ അകപ്പെട്ട് നദിയിൽ വീണ അർജ്ജുന് വേണ്ടിയുള്ള തിരച്ചിൽ മന്ദഗതിയിൽ ആയപ്പോൾ മാൽപെ പ്രതീക്ഷയുടെ പ്രത്യാശയുടെ വെളിച്ചവുമായെത്തി.

.കർണ്ണാടകയുടെ ‘അക്വാമാൻ’

ദക്ഷിണ കർണാടകയിലെ ഉഡുപ്പി മാൽപെ സ്വദേശിയാണ് ഈ 49 കാരൻ. സാഹസിക ദൗത്യങ്ങളുടെ പേരിൽ കർണാടകയുടെ ‘അക്വാമാൻ’ എന്നാണ് ഈശ്വർ മാൽപെ അറിയപ്പെടുന്നത്.

ജലാശയങ്ങളിലെ ആഴങ്ങളിൽ തിരയാനുള്ള തൻ്റെ വൈദഗ്ദ്യം ഇദ്ദേഹം സ്വയം പഠിച്ചെടുത്തതാണ്. നാവികസേനയുടെ മുങ്ങൽ വിദഗ്ധർ, എൻ.ഡി.ആർ.എഫ്, എസ് ഡി.ആർ.എഫ്, ഫയർഫോഴ്സ് എന്നിവർ പോലും അത്യാധുനിക സൗകര്യങ്ങൾ ഒക്കെ ഉണ്ടായിട്ടും ഗംഗാവലി പുഴയുടെ കുത്തൊഴുക്കിലേക്ക് ചാടാൻ മടിച്ചു നിന്നപ്പോഴും ഈശ്വറിന് പുഴയിലേക്ക് ചാടാൻ മറ്റൊന്ന് മടിയുണ്ടായിരുന്നില്ല.

പക്ഷേ, രണ്ട് ദശകത്തിനിടെ ആദ്യമായി ഗംഗാവലി പുഴ രൗദ്രഭാവത്തിൽ ഒഴുകിയപ്പോൾ ആദ്യ ശ്രമങ്ങൾ വിജയിച്ചില്ല എന്ന് മാത്രം. ഒഴുക്ക് കുറഞ്ഞതോടെ ഉടൻ ദൗത്യം പൂർത്തിയാക്കും എന്നാണ് പ്രതീക്ഷ.

രണ്ടാഴ്ചയോളം നീണ്ട രക്ഷാപ്രവർത്തനം പുഴയിലെ കനത്ത ഒഴുക്കും മഴയും കണക്കിലെടുത്ത് ജില്ലാ ഭരണകൂടം താൽക്കാലികമായി നിർത്തിവച്ചിരുന്നു. ഷിരൂരിൽ തിരച്ചിൽ പുനരാരംഭിച്ചതോടെ മാൽപെ വീണ്ടും പുഴയിലിറങ്ങി.

“അന്ന് 20 നോട്സിൽ കൂടുതലാണ് ഗംഗാവലിപ്പുഴ ഒഴുകിയിരുന്നത്. കാർ മണിക്കൂർ .100 കിലോമീറ്റർ വേഗത്തിൽ ഓടുന്നതിനു തുല്യം. ഏകദേശം 20 അടി വെള്ളത്തിനടിയിൽ എനിക്ക് എത്താനായി.ചെളി കാരണം ഒന്നും കാണാതെ മടങ്ങേണ്ടി വന്നു”. തിരച്ചിലിനെക്കുറിച്ച് ആദ്യ ദിവസങ്ങളിലെ മാൽപെയുടെ വാക്കുകൾ ഇങ്ങനെയായിരുന്നു.

. മൂന്ന് മിനിറ്റ് ശ്വാസമില്ലാതെ വെള്ളത്തിൽ

3 മിനിറ്റോളം ശ്വാസം പിടിച്ച് വെള്ളത്തിനടിയിൽ കഴിയാനാവും എന്നതാണ് മാൽപെയുടെ പ്രത്യേകത. അടുത്ത കാലം വരെയും ഓക്സിജൻ കിറ്റ് ഇല്ലാതെയാണ് ജലാശയങ്ങളിൽ മുങ്ങിത്തപ്പി മൃതദേഹങ്ങൾ പുറത്തെടുത്തിരുന്നത്.

വെള്ളത്തിൽ മാത്രമല്ല പ്രകൃതിദുരന്തങ്ങളിൽ കുടുങ്ങിയവരെയും ആത്മഹത്യയുടെ വക്കിലുള്ളവരെയും ഇദ്ദേഹം ജീവിതത്തിലേക്ക് തിരിച്ചുകൊണ്ടു വന്നിട്ടുണ്ട്.

മറ്റുള്ളവരെ സഹായിക്കുന്നത് കടമയായി കണക്കാക്കുന്ന ഈശ്വർ മാൽപെ, സേവനത്തിന് പണം കൈപ്പറ്റാറില്ല.

“ഞാൻ പണത്തിനു വേണ്ടിയല്ല ഇതൊന്നും ചെയ്യുന്നത്, എനിക്ക് ദൈവാനുഗ്രഹം മതി” എന്നാണ് ഈശ്വർ മാൽപെ പറയുന്നത്.

. കുടുംബം

ഉടുപ്പി യിലെ മാൽപേ യിൽ ഇടത്തരം കുടുംബത്തിൽ ജനിച്ച ഈശ്വർ. ഭാര്യയും മൂന്ന് മക്കളും അടങ്ങുന്നതാണ് കുടുംബം. ജന്മനാ അസുഖ ബാധിതരായ മൂന്ന് മക്കളിൽ 23 വയസ്സുള്ള മകനെ 2022 നഷ്ടമായി ഭാര്യയോടും രണ്ടു മക്കളോടും ഒപ്പം മാൽപെ ബീച്ചിന് സമീപത്താണ് താമസം

കടലിൽ അപകടങ്ങളിൽ മരിച്ച മത്സ്യത്തൊഴിലാളികളുടെയും മറ്റും മൃതദേഹങ്ങൾ ഉപേക്ഷിക്കുകയാണെന്ന് ചെറുപ്പത്തിൽ അറിഞ്ഞത് ഈശ്വറിന് ഞെട്ടലായി

മൃതദേഹം കണ്ടെത്താൻ പോലീസും തയ്യാറാകാത്ത അവസരങ്ങൾ കൂടിയപ്പോൾ ഈശ്വർ സ്വയം കടലിൽ എടുത്തുചാടി തിരച്ചിൽ ആരംഭിച്ചു മരിച്ചവരുടെ കുടുംബാംഗങ്ങൾക്ക് മൃതദേഹങ്ങളിൽ അന്ത്യകർമ്മങ്ങൾ ചെയ്യാനുള്ള അവസരം ഒരുങ്ങിയതോടെ ഈശ്വരന്മാർ ഇത്തരം ദൗത്യങ്ങൾ തൻറെ കടമയായി ഏറ്റെടുക്കുകയായിരുന്നു.

.എട്ട് അംഗ സംഘം

8 വോളൻ്റിയർമാർ അടങ്ങുന്നതാണ് ഈശ്വർ മാൽപെയുടെ ദൗത്യസംഘം. രക്ഷാപ്രവർത്തനം നടത്തുന്ന സ്ഥലത്തേക്ക് കൊണ്ടുപോകുന്നതും വെള്ളത്തിനടിയിൽ നിന്ന് കയറിട്ട് മുകളിലേക്ക് വലിക്കുന്നതും വീഡിയോ ചിത്രീകരിക്കുന്നതുമാണ് ഇവരുടെ ചുമതല.

ഇത്രയും അനുഭവവും സഹായങ്ങളും സജ്ജീകരണങ്ങളും ഉണ്ടായിട്ടും രണ്ട് ദശകത്തിനിടെ കഠിനമായ ദൗത്യമാണ് ഷിരൂരിലേതെന്നു മാൽപെ പറയുന്നു കുടുംബം ജന്മനാ ബാധ്യതരായ മൂന്നു മക്കളിൽ .

മുങ്ങിമരണം തടയാനും വെള്ളത്തിൽനിന്ന് ആളുകളെ രക്ഷിക്കാനുമായി നിരവധിപേരെ ഇദ്ദേഹം നീന്തൽ പരിശീലിപ്പിക്കുന്നുണ്ട്. കോസ്റ്റൽ സെക്യൂരിറ്റി പോലീസിനും സമുദ്ര രക്ഷാപ്രവർത്തനങ്ങളിൽ പരിശീലനം നൽകുന്ന മാൽപെ, 20 വർഷമായി നൂറിലധികം പോലീസ് ഓഫീസർമാരെയും പഠിപ്പിച്ചു

തന്റെ രക്ഷാ ദൗത്യങ്ങൾക്ക് പുറമേ സൗജന്യ ആംബുലൻസ് സേവനവും മോട്ടോർ ബോട്ടുകൾക്ക് വെള്ളം നൽകുന്ന ബിസിനസ്സും രക്ഷാപ്രവർത്തകനുണ്ട്.

Life History of Eswar Malpay

The post കർണാടകയുടെ അക്വാമാൻ; ഈശ്വർ മാൽപെ appeared first on top1kerala.

ഒരു നാടിൻ്റെ സ്വന്തവും,ഐശ്വര്യയുമായി മാറിയിരുന്നവൻ, ആന കേരളത്തിൽ എത്തിയ ശാന്ത സുന്ദരനായ കൊമ്പൻ അത് ആയിരുന്നു ഗണപതി.

ഒരു സമയത്ത് പ്രധാന എഴുന്നെള്ളിപ്പുകളിലെല്ലാം പ്രഥമസ്ഥാനം അലങ്കരിച്ചിരുന്ന കൊമ്പൻ, നമ്മളെയെല്ലാം വിട്ടുപിരിഞ്ഞിട്ട് ഇന്നേക്ക്
പത്തുവർഷം.

കേരളത്തിലെത്തി ഉത്സവപ്പറമ്പുകൾ കീഴടക്കി…

നമ്മുടെ നാട്ടിലെത്തി അധികനാളുകൾ കഴിയുന്നതിന് മുമ്പ് ഉത്സവ പറമ്പുകൾ കീഴടക്കി പ്രശസ്തിയുടെ കൊടുമുടിയിലെത്തിപ്പെട്ടവൻ ആനച്ചന്തത്തിന്റെ വേറിട്ട ഭാവവും,പ്രൗഢിയും കൊണ്ട് ഉത്സവ പൂര പറമ്പുകളിൽ നിറസാന്നിധ്യമായിരുന്നവൻ, ഇന്നും ഓർമ്മകളിലൂടെ.

ശരിയായ മലയാളിയുടെ ആനക്കമ്പത്തിൻ്റെ അടിസ്ഥാന ധാരണകൾ അവസാനം ചെന്നു നിൽക്കുന്നത് ലക്ഷ്ണത്തികവുള്ള സഹ്യൻ്റെ മക്കളിൽ തന്നെയാണ്, അതിനൊരു തെളിവാണ് ഈ ആന.

കേരളത്തിൽ ആദ്യമായി ഫാൻസ് അസോസിയേഷൻ…

കേരളത്തിൽ ആദ്യമായി ഒരു ആനക്കു വേണ്ടി ഫാൻസ് അസോസിയേഷൻ രൂപികരിച്ചിട്ടുണ്ടെങ്കിൽ അത്‌ ഇവനു വേണ്ടിയായിരുന്നു. സോഷ്യൽ മീഡിയായും, ആനപ്രേമികളുമെല്ലാം, വളർന്നു വരുന്നതിന് മുമ്പ്, 2004-2006 കാലഘട്ടങ്ങളിലാണ്.

മറുനാടൻ ചന്തം…

ഒരു കാലത്ത് നമ്മൾ ചിന്തിച്ചിരുന്നത് കേരളത്തിലെ കാടുകളിൽ പിറന്ന ആനകളെ വെല്ലാൻ മറുനാട്ടിൽ പിറന്ന ആനകളെ കൊണ്ട് സാധിക്കില്ല എന്നൊരു ചിന്ത നമുക്കെല്ലാം ഉണ്ടായിരുന്നു.കാലം മാറുമ്പോൾ കഥയും മാറുമെന്ന് പറയുന്നതുപോലെ ചില മറുനാടൻ ആനകൾ നമ്മുടെ നാട്ടിൽ എത്തിയപ്പോൾ നമുക്കിടയിൽ അങ്ങനെയുള്ള ചിന്തകളെല്ലാം മാറ്റിമറിക്കപ്പെട്ടു.

അങ്ങനെ അറിയപ്പെട്ട തലയെടുപ്പിൻ്റെ തമ്പുരാക്കൻമാർ നമ്മുടെ ഇടയിൽ ഉണ്ട്, ചിലർ ചെരിഞ്ഞു പോകുകയും ചെയ്തു. അങ്ങന്നെ ദൈവത്തിൻ്റെ സ്വന്തം നാടായ നമ്മുടെ നാട്ടിൽ എത്തിപ്പെട്ടവനാണ് പൂതൃക്കോവിൽ ഗണപതി.

ആ സമയത്ത് ഇവർക്ക് കർണ്ണൻ എന്ന ഒരു ആന ഉണ്ടായിയിരുന്നു, അടുത്ത ഒരു ആന കൂടി വേണമെന്നുള്ള തീരുമാനം ആണ് ഗണപതി പൂതൃക്കോവിൽ എത്താൻ കാരണം.

ജനനം മധ്യപ്രദേശിൽ...

വർഷങ്ങൾക്ക് മുമ്പ് 2002 കാലഘട്ടത്തിൽ നല്ല ഒരു കൊമ്പനു വേണ്ടി അന്വേഷണം നടത്തിയിരുന്ന തൃശ്ശൂരിലുള്ള ഒളരി, എൽതുരുത്ത് പൂതൃക്കോവിൽമഹാവിഷ്ണുക്ഷേത്രത്തിലെ കമ്മറ്റി ഭാരവാഹികൾ ഇവനെ കണ്ടെത്തുന്നത് മധ്യപ്രദേശിലുള്ള റീവാ ജില്ലയിൽ നിന്നായിരുന്നു.

അന്ന് ഇവനെ അറിയപ്പെട്ടിരുന്നത്, ആളിൻ്റെ അഴകിനൊത്ത പേരു തന്നെയായിരുന്നു. ആളൊരു സുന്ദരൻ ആയിരുന്നതുകൊണ്ട് സുന്ദർ ഗജ്ജ് എന്നായിരുന്നു അറിയപ്പെട്ടിരുന്നത്.

വളരെ ശാന്തവും നല്ല സ്വഭാവ ഗുണമുള്ള ഉടൽ നീളം കൂടുതൽ ഉണ്ടായിരുന്ന ഒരു ആന കൂടിയായിരുന്നു.അതു മാത്രമല്ല പണ്ടെപ്പോഴോ ഇവനെ കാശീ വിശ്വനാഥ ക്ഷേത്രത്തിൽ നടയിരുത്തപ്പെട്ടു എന്നൊരു കഥയും ഉണ്ട്.

എന്തായാലും ഇവൻ നമ്മുടെ നാട്ടിൽ എത്തുമ്പോൾ എകദേശ പ്രായം മുപ്പതു വയസ്സ്.അങ്ങനെ അവൻ തൃശ്ശൂരുകാരുടെ സ്വന്തം പൂതൃക്കോവിൽ ഗണപതിയായി മാറി.

ലക്ഷണത്തികവ്…

നല്ല ലക്ഷണമൊത്ത ഒരു ആനയായിരുന്നു ഇവൻ. എകദേശം പത്തടിക്ക് അടുപ്പിച്ച് ഉയരം, ശാന്തമായ സ്വഭാവവും, മദപ്പാടിൽ പോലും വലിയ പ്രശ്നക്കാരൻ അല്ലാത്ത ഒരു ആനയായിരുന്നു.അതുപോലെ ആന ശാസ്ത്രത്തിലെ ഒട്ടുമിക്ക ലക്ഷണ തികവുകളുമുള്ള ഒരാന.

എന്തെങ്കിലും ഒരു തെറ്റുപറയെണമെന്ന് തോന്നിയാൽ, എടുത്ത കൊമ്പുകൾ തന്നെയായിരുന്നു, എന്നാൽ വലത്തെ കൊമ്പിന് ചെറിയ ഒരു പൊട്ടൽ തുടക്കത്തിൽ ഉണ്ടായിരുന്നു, കൂടാതെ ചെവികൾ അല്പ്പം ചെറുതുമായിരുന്നു.

കേരളത്തിൽ എത്തി പത്തു വർഷത്തോളം ഉത്സവ പറമ്പുകളുടെ ഹരമായി വാഴ്ന്നു കൊണ്ടിരിക്കെ വിധിയുടെ വിളയാട്ടം, ആനക്ക് ശാരീരികമായ ക്ഷീണം കണ്ടു തുടങ്ങുകയും അധികം താമസിയാതെ മരണമെന്ന മൂന്നക്ഷരത്തിൽ 2014 ജൂലൈ ഇരുപ്പത്തി രണ്ടിന് ഇവനും യാത്രയായി.

.2003 ലെ ഒറ്റപ്പാലം ഗജമേളയിൽ ഒന്നും അറിയാത്തവനെ പോലെ കടന്ന് വന്ന് ഗ്യാലപ്പ് പോളിലൂടെ എറ്റവും കൂടുതൽ വേട്ട് നേടി ഗജരാജ പട്ടം നേടിയ ഒരു ചരിത്രകഥ ഇവനു സ്വന്തം.ഇവൻ ഇന്നും ആനപ്രേമികളുടെ മനസ്സിൽ ജീവിക്കുന്നു.

The post ഒരു നാടിൻ്റെ സ്വന്തവും,ഐശ്വര്യവുമായി മാറിയിരുന്നവൻ:- പൂതൃക്കോവിൽ ഗണപതി appeared first on top1kerala.

തിരുവനന്തപുരം: തലസ്ഥാനത്തെ കൊച്ചുവേളി,നേമം എന്നീ രണ്ട് റെയിൽവേ സ്റ്റേഷനിലെ പേര് മാറുന്നു കൊച്ചുവേളി തിരുവനന്തപുരം നോർത്ത് എന്നും നേമം തിരുവനന്തപുരം സൗത്ത് എന്നുമാണ് ഇനി അറിയപ്പെടുക. ദീർഘനാളായുള്ള സംസ്ഥാനത്തിന്റെ ആവശ്യമാണ് കേന്ദ്രം അംഗീകരിച്ചത്.

രാജ്യത്തെ വിവിധ നഗരങ്ങളിലേക്കും തിരിച്ചും നിലവിൽ ധാരാളം ട്രെയിനുകൾ കൊച്ചുവേളിയിൽ നിന്ന് സർവീസ് നടത്തുന്നുണ്ട് മറ്റു സംസ്ഥാനങ്ങളിൽ നിന്ന് വരുന്നവർക്ക് ഈ സ്റ്റേഷൻ പരിചിതമല്ല.

തിരുവനന്തപുരം സെൻട്രലിലേക്ക് കൊച്ചുവേളി, നേമം എന്നിവിടങ്ങളിൽ നിന്ന് വെറും 9 കിലോമീറ്റർ ദൂരം മാത്രമാണെങ്കിലും, ബഹുഭൂരിപക്ഷം പേരും ആശ്രയിക്കുന്നത് തിരുവനന്തപുരം സെൻട്രലിനെ തന്നെയാണ്.

തിരുവനന്തപുരം എന്ന പേര് ബ്രാൻഡ് ചെയ്ത് സമീപ ശേഷങ്ങൾ കൂടി നവീകരിക്കുന്നതോടെ ട്രെയിനുകളുടെയും യാത്രക്കാരുടെയും എണ്ണം കൂടുമെന്നാണ് പ്രതീക്ഷിക്കുന്നത്.

സ്റ്റേഷനുകളുടെ മുഖച്ഛായ തന്നെ പേരുമാറ്റത്തിലൂടെ മാറ്റാനാണ് സംസ്ഥാന സർക്കാരിന്റെ നീക്കം. തിരുവനന്തപുരം സെൻട്രൽ കേന്ദ്രീകരിച്ച് സർവീസ് നടത്തുന്ന ട്രെയിനുകളുടെ എണ്ണം പരമാവധി ആയതോടെയാണ് സമീപ സ്റ്റേഷനുകളുടെ വികസനത്തിന് പ്രാധാന്യം നൽകുന്നത്. അതിന്റെ ഭാഗമായാണ് ഈ പെരുമാറ്റവും.

The post കേന്ദ്രത്തിന്റെ പച്ചക്കൊടി; കൊച്ചുവേളി,നേമം റെയിൽവേ സ്റ്റേഷനുകളുടെ പേര് മാറ്റത്തിന് ശുപാർശ അംഗീകരിച്ചു appeared first on top1kerala.

തലയോലപ്പറമ്പുകാരുടെ സ്വകാര്യ അഭിമാനമാണ് കോട്ടയം ജില്ലയിലെ ചരിത്രപ്രസിദ്ധമായ വൈക്കത്തിനടുത്ത തലയോലപ്പറമ്പിലുള്ള ചന്ത.

തിരുവിതാംകൂർ ദളവ ആയിരുന്ന വേലുത്തമ്പി ദളവയാൽ 1800 കളുടെ ആരംഭത്തിൽ സ്ഥാപിതമായ മൂന്ന് പ്രധാന ചന്തകളിൽ ഒന്നാണ് തലയോലപ്പറമ്പ് ചന്ത.ആലങ്ങാടും, ചങ്ങനാശ്ശേരിയുമാണ് മറ്റു രണ്ടെണ്ണം.

പള്ളിക്കവലയിലെ ചന്തേൽപള്ളിയുടെ മുൻവശത്തെ ആൽമരം മുതൽ തുടങ്ങി പടിഞ്ഞാറേ കവലയിലെ പോലീസ് ഔട്ട് പോസ്റ്റു വരെയായിരുന്നു ചന്തയുടെ വിസ്തൃതി. ചൊവ്വാഴ്ചയും ശനിയാഴ്ചയുമാണ് ഇവിടുത്തെ ചന്ത ദിവസങ്ങൾ.

സാധാരണ ദിവസങ്ങളിൽ അന്തിച്ചന്തയും ഇവിടെ ഉണ്ടായിരുന്നു. വൈകുന്നേരങ്ങളിൽ അപ്പർകുട്ടനാടിൻെറ ഭാഗമായ എഴുമാന്തുരുത്ത് ഭാഗത്തുനിന്ന് പുത്തൻ തോട്ടിലൂടെ ചെറിയ വള്ളങ്ങളിൽ പഞ്ചായത്തു കടവിൽ എത്തിക്കുന്ന പുല്ലുകെട്ടും താമരപ്പൂവും മുതൽ പ്ലാവിലയും, കപ്പയും, തേങ്ങയും (വിൽപ്പനക്കായി തേങ്ങാ ഉടച്ച് ചിരട്ടയിൽ നിന്നും കൊത്തി വച്ചിരിക്കുന്ന തേങ്ങാപ്പൂൾ വരെയുണ്ടായിരുന്നു), ചന്തയിൽ എത്തിക്കുന്ന മീൻ വരെ ആയിരുന്നു സാധാരണ ദിവസങ്ങളിലെ അന്തി ചന്തയിൽ എത്തുന്ന പ്രധാന വിഭവങ്ങൾ…

കൂടാതെ സ്ഥിര സ്വഭാവത്തോടു കൂടിയ പലചരക്കുകടയും,, പച്ചക്കറികടയും, വിളക്കുകളും, കൊട്ടയും, മുറവുമെല്ലാം വിൽക്കുന്ന പാട്ടക്കടകളും എല്ലാം ചന്തയുടെ ഭാഗം തന്നെ ആയിരുന്നു.

തലയോലപ്പറമ്പിലെ ആദ്യ ഷോപ്പിംഗ് കോംപ്ലക്സ് എന്നു പറയാവുന്ന കെട്ടിടം തലയോലപ്പറമ്പ് സെൻറ് ജോർജ് പളളിയുടെ വകയായുള്ള സെന്റ് ജോർജ് ഷോപ്പിംഗ് കോംപ്ലക്സാണ്.

ഈ കെട്ടിടം പണിയുന്നതിനു മുന്നേ തന്നെ തോട്ടുപുറം കുര്യൻ ചേട്ടന്റെ പലചരക്കുകടയും ഭാസ്കരൻ ചേട്ടന്റെ ഫാൻസിസ്റ്റോർ തുണിക്കടയുമെല്ലാം പല നിലകളുള്ള കോൺക്രീറ്റ് കെട്ടിടത്തിൽ ആയിരുന്നു സ്ഥിതി ചെയ്തിരുന്നതെങ്കിലും അതെല്ലാം ഒരു കടക്ക് വേണ്ടി മാത്രമുള്ള കെട്ടിടങ്ങളായിരുന്നു.

സെന്റ് ജോർജ് ഷോപ്പിംഗ് സെന്റർ വന്നതോടെ ഭാസ്കരൻ ചേട്ടന്റെ പുകയില-മുട്ടക്കടയും, മാത്യു ചേട്ടന്റെ OK സ്റ്റോഴ്സും, അശോകൻ ചേട്ടന്റെ ബിജു ടെക്സ്റ്റയിൽസും, കുഞ്ഞേട്ടന്റെ ജിമ്മി ടെയ്ലറിംഗും, സാക്ഷാൽ ബേപ്പൂർ സുൽത്താൻ വൈക്കം മുഹമ്മദ് ബഷീറിന്റെ സഹോദരൻ ഹനീഫിക്കയുടെ ഹനീഫാ ടെയ്ലറിംഗ് ഷോപ്പും, മിനർവ റൊട്ടിക്കടയുമെല്ലാം കൂടി ചേർന്നുള വലിയൊരു വ്യാപാര സമുച്ചയമായിരുന്നു അന്ന് ഈ ഷോപ്പിംഗ് കോംപ്ലക്സ്.

ഈ കെട്ടിടമാണ്, തലയോലപ്പറമ്പിന്റെ ആധുനിക ഭാവത്തിന്റെ ആരംഭം എന്നു പറയാതെ വയ്യ.

ചന്ത ദിവസങ്ങളിലെ കഥ…

ചന്തയിലേക്കു അന്ന് വിഭവങ്ങൾ കൂടുതലായും എത്തിയിരുന്നത് ജലമാർഗ്ഗമായിരുന്നു.
പുത്തൻതോട്ടിലെ കൽപ്പടവുകൾക്കരുകിൽ കെട്ടി നിർത്തിയിരുന്ന അരി കയറ്റിയ കൂറ്റൻ വള്ളങ്ങളും, വഴക്കുലയും, പച്ചക്കറികളും കയറ്റി വന്നിരുന്ന ഇടത്തരം വളളങ്ങളും ഇവിടുത്തെ സ്ഥിരം കാഴ്ച ആയിരുന്നു ..!!

പിന്നെയുള്ളത് കാളവണ്ടികളാണ്.. പ്രദേശത്തിന്റെ കിഴക്കൻ ദിക്കുകളായ കീഴൂർ, പെരുവ, കടുത്തുരുത്തി, കാപ്പുംതല, ഞീഴൂർ ഭാഗങ്ങളിൽ നിന്നും പച്ചക്കറികളും, കിഴങ്ങുവർഗ്ഗങ്ങളും കൂടുതലായി കൊണ്ടുവന്നിരുന്നത് കാളക്കുട്ടൻമാർ വലിച്ചിരുന്ന വലിയ കാളവണ്ടികളിലായിരുന്നു.

കട കട ശബ്ദം കേൾപ്പിച്ച് മണിയും കിലുക്കി അരിക്ക്ലാമ്പ് എന്നറിയപ്പെടുന്ന, മണ്ണെണ്ണ ഒഴിച്ച് കത്തിക്കുന്ന ചില്ല് വിളക്കുകളും തെളിയിച്ച് പോകുന്ന വഴികളിലെല്ലാം ഇരുമ്പ് ചുറ്റിയ ചക്രം പതിയുന്നിടത്ത് നീളൻ വരകൾ ഉണ്ടാക്കിയായിരുന്നു കാളവണ്ടികളുടെ വരവും പോക്കും.

തിരികെ പൊകുമ്പോൾ പലചരക്കു ചാക്കുകളും ഉപ്പു ചാക്കുകളും കയററി അതാതു പ്രദേശത്തെക്കുള്ള ട്രാൻസ്പോർട്ടിംഗ് ഏജൻസി വാഹനമായും പ്രവർത്തിച്ചിരുന്ന ദ്വിമുഖ പ്രതിഭ ആയിരുന്നു ഈ കാളവണ്ടികൾ.

പിന്നെയുള്ള വാഹനങ്ങൾ ഡ്രൈവറും കിളിയും ഉള്ള മഹീന്ദ്രയുടെ കൂപ്പർ ജീപ്പും, സ്റ്റാൻറേർഡ് കമ്പനിയുടെ ടെമ്പോകളും, കൈവണ്ടി എന്നറിയപ്പെടുന്ന ഉന്തുവണ്ടികളും ആയിരുന്നു.

ചന്ത ദിവസങ്ങളായ ചൊവ്വയും ശനിയും കാളവണ്ടികൾ നിർത്തിയിട്ടിരുന്ന സ്ഥലം പള്ളിയുടെ മുൻവശത്തെ വെളിം പ്രദേശമായിരുന്നു. ഈ ഭാഗം കഴിഞ്ഞാൽ ചേന, ചേമ്പ്, കാച്ചിൽ, കിഴങ്ങ് തുടങ്ങിയവ കർഷകർ കൊണ്ടുവന്ന് വിൽപ്പന നടത്തുന്ന സ്ഥലമാണ്.

റോഡിനിരുവശത്തും ഇതിന്റെ കൂടെ ചിലർ തങ്ങളുടെ കൃഷിയിടത്തിലെ പാവക്കായും, അച്ചിങ്ങയും, തടപ്പയറും, വെള്ളരിക്കയും, കുമ്പളങ്ങ തുടങ്ങിയവയും വിൽപ്പനക്ക് വച്ചിരുന്നു.
പച്ച കപ്പളങ്ങയും, ചെറു ചേമ്പിൻ വിത്തും, കറിവേപ്പിലയും ഉൾപ്പടെ പല നാട്ടിൻപുറ വിളകളും ഈ ഭാഗത്ത് വിൽപ്പനക്കെത്തിച്ചിരുന്നു.

കൂടാതെ പല വിധത്തിലുള്ള കപ്പക്കമ്പുകൾ കെട്ടുകണക്കിന് വിൽക്കുവാൻ വച്ചിരുന്നിടം ആയിരുന്നു ഇവിടെ. വള്ളം ഊന്നുവാനുള്ള നീളൻ മുളകളുടേയും, ഉപ്പ്, ഇറച്ചി, മീൻ മുതലായവ പൊതിയുവാൻ ഉപയോഗിച്ചിരുന്ന തേക്കിലയുടെയും കച്ചവടം ഇവിടുത്തെ പാലത്തിന്റെ ഓരം ചേർന്നായിരുന്നു.

കൂടാതെ കീറി ഉണക്കിയ കെട്ടുകണക്കിന് വാഴവള്ളിയുടെ കച്ചവടവും ഇവിടുത്തെ പ്രത്യേകതയായിരുന്നു.

ഇതു കഴിഞ്ഞാൽ പിന്നെ വാഴക്കുല വിൽക്കുന്ന സ്ഥലമായി. നാടൻ പാളയൻകുടനും, ചാരം കെട്ടിയും, ഞാലിപ്പൂവനും, പച്ചപ്പടച്ചിയും, ഏത്തനും, പൂവനും തുടങ്ങി പലിവിധത്തിലുള്ളതായ കായകൾ വിൽപ്പനക്കായി നിറഞ്ഞ പ്രദേശം.

എന്തുകൊണ്ടൊ റോബസ്റ്റകൾ ആ കാലങ്ങളിൽ അത്ര സാധാരണവും അല്ലായിരുന്നു.
വാഴക്കുല വിൽക്കുന്ന സ്ഥലം കഴിഞ്ഞാൽ പിന്നെ പച്ചക്കറി വിൽക്കുന്നതിനുള്ള താല്ക്കാലിക കടകളായി.

നീളമുള്ള മുളകളുടെ ഒരു വശം ചേർത്ത് കെട്ടി അവ അകത്തി വച്ച് മുക്കാലികളാക്കി അതിൽ ത്രാസും തൂക്കിയിട്ട് പച്ചക്കറികൾ നിലത്ത് കൂന കൂട്ടിവിറ്റിരുന്നവർ.. മാങ്ങാ വിൽക്കുന്നവർ, കന്നാര ചക്കയും, കടച്ചക്കയും വിൽക്കുന്നവർ.. എല്ലാം ഇവിടത്തെ കച്ചവടക്കാരാണ്. കപ്പ മന്ന് കണക്കിന് വിറ്റിരുന്ന സ്ഥലവും ഇതു തന്നെ ആയിരുന്നു.

ഈ പ്രദേശത്ത് രണ്ട് വലിയ പൂവരശുകൾ നിന്നിരുന്നു. ഒന്ന് പഴയ വില്ലേജോഫീസിന്റെ ഭാഗത്തും മറ്റാെ പാലത്തിന് പടിഞ്ഞാറു ഭാഗത്തുമായി, ഏതു സമയത്തും നിറയെ മഞ്ഞ നിറമുള്ള പൂക്കളുമായി രണ്ടെണ്ണം.

പിന്നീട് ചന്തയുടെ ഭാഗമായി വരുന്ന സ്ഥലം ചന്ത കപ്പേളയോട് ചേർന്ന ഭാഗമാണ്…
അവിടെയുള്ള സ്ഥിരം കടകൾ പപ്പടത്തിനു പ്രശസ്തമായിരുന്നു. ഗീത പപ്പടം വർക്സും മറ്റുമായിരുന്നു പപ്പടക്കടകളിൽ പ്രശസ്തമായവ.

ഇതിന്റെ മുൻഭാഗത്തെ വഴിയുടെ ഇരുവശങ്ങളിലും ആയിരുന്നു ചന്ത ദിവസങ്ങളിൽ കോഴി, താറാവ്, ആട് തുടങ്ങിയവയുടെ കച്ചവട സ്ഥലം.. അവിടെ വിൽപ്പനക്കാരായവർ പക്ഷിമൃഗാദികളെ കൊണ്ടുവന്നിരുന്നവരും ഇതിനെ വാങ്ങുവർ കച്ചവടക്കാരും ആയിരുന്നു. അതിനാൽ തന്നെ ഇവിടുത്തെ കച്ചവടം സാധാരണ കച്ചവട സ്ഥലത്തിന്റെ നേരെ എതിർ രീതിയിലായിരുന്നു.

ഇവിടെ സാധനങ്ങൾ വിൽക്കുവാൻ കൊണ്ടുവരുന്നവരെ ഒരുതരത്തിൽ വരിഞ്ഞുമുറിക്കിയുള്ള കച്ചവടത്തിനു വേണ്ടി ഇവർ ഉപയോഗിച്ചിരുന്ന തന്ത്രം അവർ തമ്മിൽ പരസ്പ്പരമുള്ള ധാരണയും പ്രത്യേക കോഡുഭാഷയും ആയിരുന്നു.

അതിനാൽ തന്നെ സാധാരണക്കാർ ഇവിടെ ഒരാൾ വിൽക്കുവാൻ കൊണ്ടുവരുന്ന ഒരു കോഴിക്ക് ഇവിടുത്തെ കച്ചവടക്കാർ ആദ്യം പറയുന്ന വിലയിലും താഴ്ത്തി മാത്രമേ വിൽപ്പന പിന്നീട് നടക്കുകയുള്ളു.. ചെറിയ രീതിയിലുള്ള മലഞ്ചരക്ക് ബിസിനസുകളും ഇവിടെ ആയിരുന്നു.

ഈ സ്ഥലത്തിന്റെ അവസാന ഭാഗമായ കപ്പേളയുടെ മുൻ ഭാഗം ചെറുനാരങ്ങായും, വൃക്ഷ തൈകളും വിൽക്കുന്ന സ്ഥലമാണ്. പെരുമരവും, തേക്കും,തെങ്ങിൻ തൈകളും തുടങ്ങി പലവിധ മരങ്ങളുടെ തൈകൾ വിറ്റിരുന്ന സ്ഥലം.
തുടർന്ന് തെറുപ്പു ബീഡി, വെറ്റില, അടയ്ക്കാ, ചുണ്ണാമ്പ് വിൽക്കുന്നവരുടെ സ്ഥലമായി.

പിന്നീട് തേങ്ങയും, നിലത്തിട്ട് വിൽക്കുന്ന തുണിത്തരങ്ങളുമായി കുറച്ചു പേർ.,
തോർത്ത്, ലുങ്കി, അണ്ടർ വയറുകൾ, ചട്ടപോലെ ആണുങ്ങൾ ഉപയോഗിച്ചിരുന്ന ഉടുപ്പ് തുടങ്ങിയവ ആയിരുന്നു ഇവടെയുള്ള വസ്ത്രവ്യാപാരികളുടെ സാധനങ്ങൾ ..

അടുത്ത സ്ഥലം പനം ചക്കരയും, നാടൻ കോഴിമുട്ടയും താറാവിൻ മുട്ടയും വിൽക്കുന്നവർ ധാരാളമുള്ള സ്ഥലമായിരുന്നു.

ഇവർക്കിടയിൽ ചെറിയ സ്റ്റീൽ, അലുമിനീയം, മൺപാത്രങ്ങൾ വിൽക്കുന്നവരും, കത്തി, ചിരവ, ചിരട്ടത്തവി, തവി തൂക്കി എന്നറിയപ്പെട്ടിരുന്ന പലക, കൂവ പിഴിയുന്ന ഉരകോൽ, കടകോൽ തുടങ്ങിയവ വിൽക്കുന്നവരും ഉണ്ടായിരുന്നു.

പിന്നീട് മീൻ ചന്തയുടെ ജംഗ്ഷന് പടിഞ്ഞാറേക്ക് പോലീസ് ഔട്ട് പോസ്റ്റു വരെ പല വണ്ണത്തിലും തരത്തിലുമുള്ള ചകിരിക്കയറുകൾ, തഴപ്പായ, നെല്ല് ഉണക്കാനുള്ള ചിക്കു പായ, പനമ്പ്, മുറം, കുട്ട, വല്ലം തുടങ്ങിയവ വിൽപ്പന നടത്തുന്നവരായി .. !!

ഇതിന് ഇടക്ക് വലതു ഭാഗത്ത് പാലാംകടവ് കടത്തിലേക്കുള്ള റോഡിൽ ആയിരുന്നു, മീൻ മാർക്കറ്റും, പച്ചക്കറിക്കടകളും.

ചന്തക്കുള്ളിൽ തന്നെ സ്ഥിതി ചെയ്യുന്ന പഞ്ചായത്തോഫീസിനോടനുബന്ധിച്ചുള്ള സൈറന്നുകൾ കൃത്യ സമയത്തു തന്നെ കൂവിക്കൊണ്ടിരിക്കുമ്പോൾ വാച്ചുകളും ക്ലോക്കുകളും അത്ര സർവ്വസാധാരണമല്ലാതിരുന്ന അക്കാലത്ത് ഇതൊരു അത്ഭുത പ്രതിഭാസമായിട്ടായിരുന്നു

വില്ലേജോഫീസിന്റെ സമീപമുള പൂവരശിനു കീഴിൽ പാർക്കു ചെയ്തിരുന്ന പുന്നൂസ് ഡോക്ടറുടെ KL0 – 1188-ാം നമ്പർ കാറും അതുപോലൊരു അത്ഭുതമായിരുന്നു.

അക്കാലത്ത് ഇവിടെ ഒരു സാധനം വിൽക്കണമെന്നുണ്ടെങ്കിൽ പഞ്ചായത്ത് കരം ഒടുക്കണമായിരുന്നു . (എന്റെ ഓർമ്മയിൽ കുഞ്ഞേട്ടനായിരുന്നു കരം പിരിവിനുള്ള ലൈസൻസ് ഉണ്ടായിരുന്നത്..) ചന്തക്കുള്ളിൽ കോഴിയെ വിൽക്കണമെങ്കിലും, വാഴക്കുല വിൽക്കണമെങ്കിലും നിശ്ചിത തുക പഞ്ചായത്തിൽ കരമായി നൽകിയാൽ മാത്രമേ വിൽപ്പനക്ക് അനുവാദമുണ്ടായിരുന്നുള്ളു.

രാഷ്ട്രീയ രംഗത്തെ പ്രാദേശിക നേതാവായിരുന്ന കൊച്ചു ജോസഫ്കണ്ടത്തിൽ, മാർക്കറ്റ് റോഡിലുണ്ടായിരുന്ന കാർലീൻ സ്റ്റുഡിയോ, ബാബു സ്റ്റുഡിയോ, കച്ചവട രംഗത്തെ പ്രശസ്തരായ ഞാറവേലിൽ, ഇരട്ട പുര, പനക്കൽ, ആനാപ്പറമ്പിൽ കുടുംബങ്ങൾ, പട്ടശ്ശേരിൽ ഹാർഡ്വെയേഴ്സ്, പടശ്ശേരിൽ ടെക്സ്റ്റൈൽസ്, KR സ്ട്രീറ്റിലുണ്ടായിരുന്ന മനോഹരൻ ചേട്ടന്റെ ചായക്കട, തങ്കപ്പൻചേട്ടന്റെ സ്റ്റാർ കഫേ, ശങ്കേഴ്സ് ടെയ്ലറിംഗ് ഷോപ്പ്, ഗോപാലൻ ചേട്ടന്റെ പച്ചമരുന്നുകട, കൂരാപ്പളളിൽ മെഡിക്കൽ സ്റ്റോഴ്സ്, തുടങ്ങിയ പല കച്ചവട സ്ഥാപനങ്ങളെയും വ്യക്തികളെയും, കുടുംബങ്ങളെയും ഓർക്കാതിരിക്കുവാൻ സാധിക്കില്ല.

പകൽ സമയങ്ങളിൽ ചന്തയിൽ മേഞ്ഞു നടന്നിരുന്ന പശുക്കളുടെ കൂട്ടവും, ആടുകളുടെ കൂട്ടവും നിറമുള്ള ഓർമ്മയാണ്.

പിന്നെയുള്ളത് അങ്ങാടിക്കുരുവികളുടെ കലപിലയായിരുന്നു. ആയിരക്കണക്കിന് അങ്ങാടി കുരുവികൾ പറന്നു നടന്നിരുന്ന ചന്തയും, അവക്ക് പാർക്കുവാനായി ഓരോ കടയിലും സ്ഥാപിച്ചിരുന്ന ചെറിയ മൺകുടങ്ങളും നീറുന്ന ഓർമ്മയായി മനസ്സിൽ വിങ്ങുന്നു. (ഇക്കാലത്ത് ഒരു അങ്ങാടി കുരുവിയെ പോലും കണി കാണുവാൻ കൂടിയില്ല..)

ഇതായിരുന്നു പഴയ തലയോലപ്പറമ്പ് ചന്തയുടെ ചരിത്രം ……..!

എഴുത്ത്‌ : ജയ്മോൻ പി ദേവസ്യ

The post വേലുത്തമ്പിദളവയാൽ സ്ഥാപിതമായ തലയോലപ്പറമ്പ് ചന്ത appeared first on top1kerala.

വർഷങ്ങളായി രാത്രിയിൽ വയനാട്ടിലെ മുണ്ടക്കൈയിലേക്ക് ഓടുന്ന അവസാന ബസ്. രാത്രി ചൂരൽ‍മലയിലെത്തി അവിടെ നിർത്തിയിടും. ആ ബസ്സ് 4 ദിവസമായി ചൂരൽമലയിൽ നിർത്തിയിട്ടിരിക്കുന്നത്. ഈ തിരികെ കൽപ്പറ്റയിലേക്ക് വന്നിട്ടില്ല.

ഉരുൾപൊട്ടലിന്റെ ദുരിതകഥ പുറംലോകത്തെത്തിച്ച ആദ്യവ്യക്തികൾ ഈ KSRTC ബസ്സിലെ ജീവനക്കാരായിരുന്നു. മുണ്ടക്കൈയിലേക്കു കൽപ്പറ്റയിൽനിന്നുള്ള KSRTC ബസ്സിലെ കണ്ടക്ടർ കൊടുവള്ളി തലപ്പെരുമണ്ണ സ്വദേശി സി.കെ.മുഹമ്മദ് കുഞ്ഞിയും ഡ്രൈവർ പി.വി.സജിത്തും.

തിങ്കളാഴ്ച രാത്രിയും പതിവുപോലെ മുണ്ടക്കൈയിൽ ആളെയിറക്കി. രാത്രി 8.30 ന് കൽപ്പറ്റയിൽ നിന്നെടുക്കുന്ന ബസ് 9.45ന് മുണ്ടക്കൈയിലെത്തിയത്. അന്ന് രാത്രി ബസ്സിൽ നിന്നിറങ്ങിയ പലരും ജീവിതത്തിലേക്കാണോ മരണത്തിലേക്കാണോ ഇറങ്ങിപ്പോയത് എന്നുപോലും അറിയില്ല.

ബസ് ചൂരൽമല ക്ഷേത്രത്തിനുമുന്നിലെ റോഡിലൂടെ ക്ലിനിക്കുമുന്നിലെത്തി അവിടെയാണ് പാർക്ക് ചെയ്യാറുള്ളത്. ക്ലിനിക്കിനോടു ചേർന്നുള്ള മുറിയിലാണ് ഡ്രൈവറും കണ്ടക്ടറും രാത്രി ഉറങ്ങാറുള്ളത്.

ചൊവ്വാഴ്ച രാവിലെ ഒരു മണിയോടെയാണ് ഉരുൾപൊട്ടിയത്. പക്ഷേ ചൂരൽമലയിൽനിന്ന് രണ്ടരകിലോമീറ്റർ ദൂരെയായതിനാൽ മുഹമ്മദ് കുഞ്ഞി ശബ്ദം കേട്ടില്ല. 4 മണിയോടെ വീണ്ടും ഉരുൾപൊട്ടി. അകലെനിന്ന് പാറക്കല്ലുകളും മരങ്ങളും ഒഴുകിവന്ന് ഇടിക്കുന്നതിന്റെ ശബ്ദം കേട്ടാണ് ഇരുവരും എഴുന്നേറ്റത്.

അതേസമയം അപകടവിവരമറിഞ്ഞ കൽപ്പറ്റ ഡിപ്പോയിലെ സ്റ്റേഷൻ മാസ്റ്റർ പ്രശാന്ത് ആശങ്കയിലായിരുന്നു. രാവിലെ 3 മുതൽ ഇരുവരെയും ഫോണിൽവിളിച്ചിട്ട് കിട്ടുന്നില്ല. 4 മണിയോടെ ഇരുവരും തിരികെവിളിച്ചു. ഉരുൾപൊട്ടിയെങ്കിലും ബസ്സും തങ്ങളും സുരക്ഷിതരാണെന്നു പറഞ്ഞു. പരിചയമില്ലാത്തതിനാൽ‍ പുറത്തിറങ്ങരുതെന്ന് എല്ലാവരും വിളിച്ചുപറഞ്ഞു.

രാവിലെ നേരം വെളുത്തപ്പോൾ ഇരുവരും പുറത്തിറങ്ങി. കണ്ട കാഴ്ച ഹൃദയഭേദകമായിരുന്നു. തങ്ങൾ കടന്നുവന്ന പാലമില്ല. അക്കരെ ചൂരൽമല അങ്ങാടിയില്ല. കെട്ടിടങ്ങളില്ല. വീടുകളും പാഡികളും കാണാനില്ല. ഇരുവരും ഉടനെ ഫോണിൽ വിഡിയോ പകർത്തി എല്ലാവർക്കും അയച്ചു.

ബുധനാഴ്ച രാവിലെയോടെ പുഴയ്ക്കു കുറുകെ സൈന്യം താൽക്കാലിക പാലം നിർമിച്ചു. വൈകിട്ട് 6.30 ന് ഇരുവരും ഇക്കരെയെത്തിയതെന്ന് മുഹമ്മദ്കുഞ്ഞി പറഞ്ഞു. ബസ്സ് ഇപ്പോഴും അക്കരെ കിടക്കുകയാണ്.

The post മടങ്ങാൻ വഴിയില്ലാതെ ചൂരൽമലയുടെ KSRTC appeared first on top1kerala.

ഒരു മനുഷ്യന്റെ ജീവിതത്തിൽ ഒരിക്കലെങ്കിലും ഓർക്കുകയോ, പ്രയോഗിക്കുകയോ, പിന്തുടരാൻ, ആഗ്രഹിക്കുകയോ, ചിന്തിപ്പിക്കുകയോ, വഴികാട്ടുകയോ ചെയ്യുന്ന ഒന്നാണ് മഹാന്മാരുടെ മഹത് വചനങ്ങൾ. എക്കാലത്തും അനുസ്മരിച്ച് പോകുന്നപി ചിന്താ തരംഗങ്ങളുടെ ഒരു സമാഹാരം തയ്യാറാക്കുന്ന തിരക്കിലാണ് കോട്ടയം ജില്ലയിലെ കുറിച്ചിത്താനം സ്വദേശി എസ് പി നമ്പൂതിരി .

എസ്.പി.നമ്പൂതിരി

മൊഴിമുത്തുകൾ എന്ന പേരിൽ ഒരു വ്യാഴവട്ടത്തിലേറെയായി ശേഖരിച്ച വിശ്വചിന്തകരുടെയും ഭാരതീയ പുരാണ ഇതിഹാസങ്ങളിലെയും തുടങ്ങി സമൂഹത്തിലെ എല്ലാ വിഭാഗങ്ങളിലുമുള്ള പ്രശസ്തരും അല്ലാത്തതുമായ നിരവധി വ്യക്തികളുടെ വചനങ്ങൾ ഇതിൽ ഇടം പിടിച്ചിരിക്കുന്നു. 35,000 എണ്ണം മഹദ്ചനങ്ങൾ ശേഖരിക്കാൻ ശ്രമിക്കുന്നതിൽ ഇപ്പോൾ 34000 എണ്ണം ശേഖരിച്ചു കഴിഞ്ഞു.

https://youtu.be/bctPqoW_Lcc

തന്റെ ബ്രിട്ടീഷ് സന്ദർശനത്തിനിടയിൽ ഓക്‌സ് ഫോഡ് സർവകലാശാലയിൽ വെച്ച് ‘ഡിഷ്ണറി ഓഫ് കൊട്ടേഷൻസ്’ എന്ന പുസ്തകം കാണുകയും അതിൽ ഗാന്ധിജി, ബുദ്ധൻ, വിവേകാനന്ദൻ തുടങ്ങി പല ഇന്ത്യക്കാരുടെയും വചനങ്ങൾ ഈ പുസ്തകത്തിൽ ഇടം പിടിച്ചിരുന്നില്ല. ഈ പോരായ്മകൾ പരിഹരിച്ച് മലയാളത്തിൽ മഹത് വചനങ്ങൾ പ്രസിദ്ധീകരിക്കണമെന്ന് ആഗ്രഹമുദിച്ചത് അന്നാണെന്ന് എസ്.പി. നമ്പൂതിരി പറയുന്നു.

പ്രസിദ്ധീകരണത്തിന് ഏറ്റവും വലിയ ബുദ്ധിമുട്ട് പ്രസാധകരെ ലഭിക്കുന്നതിനാണെന്ന് ഇദ്ദേഹം പറയുന്നു. തന്റെ മുൻ പുസ്തകങ്ങളുടെ പ്രസിദ്ധീകരണവുമായി ബന്ധപ്പെട്ട പ്രസാധകാരുടെ ഭാഗത്തുനിന്ന് ചില തിക്താനുഭവങ്ങൾ ഉണ്ടായതായി ഇദ്ദേഹം പറയുന്നു.

ഇദ്ദേഹത്തിന്റെ അഭിപ്രായത്തിൽ പ്രസാധകർ രാജാവും എഴുത്തുകാരൻ സാധാരണ പൗരനും ആണ്.

അധികം ആരും ശ്രദ്ധിക്കാത്ത കസ്തൂർബാഗാന്ധിയുടെ

“വാക്കിൽ മാത്രം ഒതുക്കേണ്ടതാണോ ദീനാനുകമ്പകൾ”

ഗോഡ്സേയുടെ വചനങ്ങൾ തുടങ്ങിയവ ഇതിൽ ഉൾക്കൊള്ളിച്ചിട്ടുണ്ട് ഓരോ വചനങ്ങളുടെയും സന്ദർഭവും അർത്ഥവും ഇതിൽ ഉൾക്കൊള്ളിച്ചിട്ടുണ്ട് അനുഷ്‌ട്ടുപ്പ് വൃത്തത്തിലാണ് മൊഴിമുത്തുകളുടെ രചന.

മലയാളത്തിന്റെ ചരിത്രത്തിന് എന്നും ഒരു മുതൽക്കൂട്ടാവുന്ന ഒരു ഗ്രന്ഥം ആയിരിക്കും മൊഴിമുത്തുകൾ.

കവിത, യാത്രാവിവരണം, കഥകൾ എന്നീ മേഖലകളിൽ രചനകൾ നടത്തിയ എസ്പി നമ്പൂതിരി വയലാർ രാമവർമ്മയെ കുറിച്ച് ഉള്ള

വയലാർ രാമവർമ്മ വ്യക്തിയും കവിയും‘

‘എന്ന പുസ്തകം വളരെ ശ്രദ്ധ നേടുകയും ചർച്ചയാവുകയും ചെയ്തു. ‘

ഓപ്പോൾ’ എന്ന ചെറുകഥയും ‘ഒരു നൂറ്റാണ്ടിന്റെ നൊമ്പരം’, ‘പൂണൂൽ പൊട്ടിച്ചിടട്ടെ ഞാൻ’ എന്നീ കവിത സമാഹാരങ്ങളും * ‘മഹാക്ഷേത്രങ്ങളിലൂടെ’, ‘നന്നയ്യഭട്ടിന്റെ നാട്ടിൽ’, ‘ലങ്കാദർശനം’, ‘ഡച്ചു സാമ്രാജ്യത്തിന്റെ ഹൃദയ ഭൂമിയിൽ’, എന്നീ യാത്ര വിവരണങ്ങളും ‘പെറ്റമ്മയും പോറ്റമ്മയും- ഒരു നമ്പൂതിരി കഥ’ എന്ന നോവലും മൂന്ന് ശസ്ത്രക്രിയയ്ക്ക് വിധേയയായ സഹധർമിണിയുടെ ജീവിതത്തെ ആസ്പദമാക്കി രചിച്ച ‘ഹൃദയസ്വാന്ത്വനം’ എന്ന പുസ്തകത്തിന്റെ രണ്ടാം ഭാഗത്ത് ഹൃദ്രോഗ പ്രതിരോധത്തെ കുറിച്ചുള്ള ശാസ്ത്രീയ വിവരങ്ങളും ഉൾക്കൊള്ളിച്ചിരിക്കുന്നു.

ഈ പുസ്തകത്തിൽ നിന്ന് ലഭിച്ച വരുമാനം കോട്ടയം മെഡിക്കൽ കോളേജിൽ ഹൃദയ ശസ്ത്രക്രിയയ്ക്ക് വിധേയനാകേണ്ടി ഒരു രോഗിക്ക് നൽകി.

മഹാക്ഷേത്രങ്ങളിലൂടെ എന്ന രചനയിലെ ശബരിമല ക്ഷേത്രത്തെ കുറിച്ചുള്ള ലേഖനം നിമിത്തം ഇദ്ദേഹത്തിന് സുപ്രീംകോടതിയിൽ സ്ത്രീ പ്രവേശന വിഷയത്തിൽ കക്ഷി ചേരേണ്ടിവന്നു. ശബരിമല സ്ത്രീ പ്രവേശന വിഷയത്തിൽ ഒരു വ്യക്തിയെന്ന നിലയിൽ കക്ഷി ചേർന്നത് എസ് പി നമ്പൂതിരി മാത്രമായിരുന്നു.

ഇദ്ദേഹത്തിന്റെ സത്യവാങ്മൂലത്തിൽ സ്ത്രീകളെ സംബന്ധിക്കുന്ന വിഷയമായതിനാൽ കേസ് പരിഗണിക്കുന്ന ബെഞ്ചിൽ
ആനുപാതികമായി വനിതാ പ്രാതിനിധ്യം ആവശ്യപ്പെടുകയും ഈ വാദം ഭാഗികമായി അംഗീകരിക്കുകയും ജസ്റ്റിസ് ഇന്ദുമൽഹോത്ര എന്ന വനിതാ ജഡ്ജിയെ ബെഞ്ചിൽ ഉൾപ്പെടുത്തുകയും ചെയ്തു.

കഴിഞ്ഞ നൂറ്റാണ്ടിലെ പ്രസിദ്ധനായ ആയുർവേദ ആചാര്യന്മാരിൽ ഒരാളും കവിയുമായിരുന്ന മഠം ശ്രീധരൻ നമ്പൂതിരിയുടെയും തലയാറ്റുംപ്പിള്ളി ഇല്ലത്ത് നങ്ങേലി അന്തർജ്ജനത്തിന്റെയും മകനായി ജനിച്ച എസ് പി നമ്പൂതിരി പരമ്പരാഗത രീതിയിൽ സംസ്കൃതവും ആയുർവേദവും അഭ്യസിച്ചു തിരുവനന്തപുരം എംജി കോളേജിൽ നിന്നും മലയാളത്തിൽ ബിരുദത്തിന് ശേഷം രാഷ്ട്രീയത്തിലേക്കും പത്രപ്രവർത്തനത്തിലേക്കും തന്റെ കർമ്മ മണ്ഡലം വ്യാപിപ്പിച്ചു.

കമ്മ്യൂണിസ്റ്റ് പാർട്ടി എറണാകുളത്തു നിന്നും പ്രസിദ്ധീകരിച്ചിരുന്ന നവലോകം എന്ന ദിനപത്രത്തിന്റെ പത്രാധിപസമിതിയിൽ അംഗമായിരുന്നു ചെറുകാട്, എം ആർ ബി, എം എം ലോറൻസ്, തുടങ്ങിയവരോടൊപ്പം പ്രവർത്തിച്ച ഇദ്ദേഹം ഇഎംഎസ്, എകെജി, സി. ഉണ്ണിരാജ, എൻ. ഇ. ബലറാം, സി അച്യുതമേനോൻ, ഡിഎം പൊറ്റക്കാട്, എൻവിഎസ് വാര്യർ എന്നിവരുമായി അടുത്ത ബന്ധം കാത്തുസൂക്ഷിച്ചു.

വയലാർ രാമവർമ്മ സാഹിത്യ മേഖലയിലെ സഹപ്രവർത്തകനും അടുത്ത സുഹൃത്തുമായിരുന്നു പിന്നീട് പത്രപ്രവർത്തനം നിർത്തി നാട്ടിലേക്ക് മടങ്ങി കുടുംബ തൊഴിലായ ആയുർവേദവുമായി ബന്ധപ്പെട്ട പ്രവർത്തനങ്ങളിൽ ഏർപ്പെട്ടു. ദീർഘകാലമായി ശ്രീധരീ ഗ്രൂപ്പ് സ്ഥാപനങ്ങളുടെ അമരക്കാരനാണ് s p നമ്പൂതിരി.

സ്വാതന്ത്ര്യസമരസേനാനിയും സാമൂഹ്യ പരിഷ്കർത്താവും ഗ്രന്ഥകാരനുമായ മോഴിക്കുന്നം ബ്രഹ്മദത്തൻ നമ്പൂരിയുടെ പുത്രി ശാന്തയാണ് പത്നി. ഡോക്ടർ മഞ്ചേരി, ഡോക്ടർ ശൈലി എന്നിവർ മക്കളാണ്.

സാമവേദ പണ്ഡിതനും ആയുർവേദ ഡോക്ടരുമായ ഡോ.തോട്ടം ശിവകരൻ നമ്പൂതിരി, കോഴിക്കോട് NIT പ്രൊഫെസർ ഡോ.മുരളി എന്നിവർ മരുമക്കളുമാണ്.

നമ്പൂതിരി സമുദായത്തിലെ വിപ്ലവകാരികളായ നവോത്ഥാന നായകരുടെ പിന്മുറക്കാരുടെ കൂട്ടായ്മയായ നമ്മളൊന്ന് എന്ന സംഘടനയുടെ ഉപദേശ സമിതി ചെയർമാൻ, നവോത്ഥാന മൂല്യ സംരക്ഷണ സമിതിയുടെ കോട്ടയം ജില്ല അധ്യക്ഷൻ,സ്റ്റേറ്റ് സെക്രട്ടറിയേറ്റു മെമ്പർ, പ്രസിദ്ധമായ കുറിചിത്താനം പൂതൃക്കോവിൽ ക്ഷേത്രം, കാരിപ്പടവത്തുകാവ് ദേവി ക്ഷേത്രം എന്നിവയിലെ ട്രസ്റ്റ് അംഗവും എന്നീ ചുമതലകളും എസ്പി നമ്പൂതിരി വഹിക്കുന്നു.

The post മഹത് വചനങ്ങളുടെ വൻ ശേഖരമൊരുക്കാൻ എസ് പി നമ്പൂതിരി appeared first on top1kerala.

ദുരന്തനിവാരണത്തിനും സൈനികാവശ്യങ്ങൾക്കുമാണ് ഇന്ന് ഇത്തരം പാലം നിർമ്മിക്കുന്നത്. മുമ്പുതന്നെ നിർമ്മിച്ചുവച്ച ഭാഗങ്ങൾ പെട്ടെന്നുതന്നെ ഇതു നിർമ്മിക്കേണ്ട സ്ഥലത്തെത്തിച്ച് കൂട്ടിച്ചേർത്താണിതു നിർമ്മിക്കുന്നത്.

കേരളത്തിൽ ആദ്യം റാന്നിയിൽ

കേരളത്തിൽ ആദ്യമായി സിവിലിയൻ ആവശ്യങ്ങൾക്കായി ബെയിലി പാലം നിർമ്മിച്ചത് പമ്പാ നദിക്കു കുറുകെ പത്തനംതിട്ട ജില്ലയിലെ റാന്നിയിലാണ്.

റാന്നിയിലെ പമ്പാനദിക്കു കുറുകെയുള്ള 36 വർഷം പഴക്കമുള്ള റാന്നി പാലം 1996 ജൂലൈ 29ന് തകർന്നപ്പോളാണ് പകരം ഇത്തരം താത്കാലിക പാലം സൈന്യം നിർമ്മിച്ചത്. 1996 നവംബർ 8 നാണ് റാന്നിയിൽ സൈന്യം ബെയിലി പാലം നിർമ്മിച്ചത്.

കരസേനയുടെ സഹായത്തോടെ നിർമ്മിച്ച ഈ പാലം പുതിയപാലം പണിതതോടെ പൊളിച്ചുമാറ്റി 790 ദിവസമാണ് ഇതിലൂടെ വാഹനങ്ങൾ സഞ്ചരിച്ചത്

ശബരിമല സന്നിധാനത്ത് 2011നവംബർ 7നു പൂർത്തിയാക്കിയ ബെയിലി പാലം ഇപ്പോളും ഉപയോഗത്തിൽ ഉണ്ട്. ബലക്ഷയം ഉണ്ടായ സമയത്ത് ഏനാത്ത് പാലത്തിന് ബദലായും സൈന്യം ബെയ്ലി പാലം നിർമ്മിച്ചിരുന്നു

രാജ്യത്തെ തന്നെ ഞെട്ടിച്ച 2024ലെ വയനാട് ഉരുൾ പൊട്ടലിനെ തുടർന്ന് ഒറ്റപ്പെട്ട വയനാട് മുണ്ടക്കൈ ഗ്രാമത്തിലേക്ക് 190 അടി നീളവും 24 ടൺ ഭാരം വഹിക്കാൻ ശേഷിയുമുള്ള പാലം കുറഞ്ഞ സമയം കൊണ്ട് പണിതീർത്ത് രക്ഷാപ്രവർത്തനത്തിന് വേഗം കൂട്ടി

രാജ്യത്ത് ആദ്യമായി സൈനികാ ആവശ്യത്തിനായി ബെയ്‌ലി പാലം നിര്‍മ്മിച്ചത് കശ്മീരിലാണ്. ലഡാക്കിലെ ദ്രാസ് നദിക്കും സുറു നദിക്കുമിടയില്‍ ആണ് ഈ പാലം നിര്‍മ്മിച്ചത്. ഇതിന് 30 മീറ്റര്‍ ( 98 അടി ) നീളമാണ് ഉണ്ടായിരുന്നത്. സമുദ്ര നിരപ്പില്‍ നിന്നും 5,602 മീറ്റര്‍ ഉയരത്തിലാണ് സ്ഥിതിചെയ്യുന്നത്. ഇന്ത്യന്‍ ആര്‍മിയാണ് ഈ പാലം നിര്‍മ്മിച്ചത്

ബെയിലി പാലത്തിന് പല ഗുണങ്ങളുമുണ്ട്. ഇവ നിർമ്മിക്കാൻ പ്രത്യേക ഉപകരണങ്ങളുടെ ആവശ്യമില്ല. കൂട്ടിച്ചേർക്കാൻ ഭാരം കൂടിയ യന്ത്രങ്ങളും വേണ്ട.

തടികൊണ്ടും ഉരുക്ക് കൊണ്ടും മുമ്പുതന്നെ ഉണ്ടാക്കപ്പെട്ടിട്ടുള്ള ചെറുഭാഗങ്ങൾ ഭാരം കുറഞ്ഞതും ചെറുതുമായതിനാൽ ഒരു സ്ഥലത്തുനിന്നു മറ്റൊരിടത്തേയ്ക്ക് ട്രക്കിൽ കൊണ്ടുപോകാൻ പ്രയാസമില്ല.

ഭാരം കുറഞ്ഞ ഭാഗങ്ങളായതിനാൽ കൈകൊണ്ടുതന്നെ വച്ചുപിടിപ്പിക്കാം. ക്രയിന്റെ ആവശ്യം വരുന്നില്ല. പക്ഷെ, ഇവ നല്ല ഉറപ്പുള്ളതാണ്. വലിയ ടാങ്കുകളെ വരെ ഇതിലൂടെ കൊണ്ടുപോകാം.

സിവിൽ എഞ്ചിനീയറിങ്ങിൽ ഇവ വളരെ കാര്യങ്ങൾക്കായി ലോകവ്യാപകമായി ഉപയോഗിച്ചുവരുന്നു. നിർമ്മാണപ്രവർത്തന സമയം ഇവയുപയോഗിച്ച് താത്കാലികമായി നടപ്പാതകളും ചെരുവാഹനങ്ങൾക്കുള്ള പാലവും നിർമ്മിക്കുന്നു.

ചരിത്രം

ബ്രിട്ടീഷ് സിവിൽ ഉദ്യോഗസ്ഥനായിരുന്ന ഡൊണാൾഡ് ബെയിലിയാണ് ആദ്യമായി ഇത്തരമൊരു പാലം നിർമ്മിച്ചത്. രണ്ടാം ലോകമഹായുദ്ധസമയത്തായിരുന്നു അദ്ദേഹം യുദ്ധത്തിനു സഹായകമായി ഉത്തരാഫ്രിക്കയിൽ ബ്രിട്ടന്റെ ടാങ്കുകൾക്ക് ദുർഘടമായ മലനിരകൾ കടന്നുപോകാൻ നിർമ്മിച്ചത്.

ഒരു ഹോബിപോലെയാണ് അദ്ദേഹം പാലങ്ങൾ നിർമ്മിച്ചിരുന്നത്. അതിൽ ഒരു പാലത്തിന്റെ മാതൃക തന്റെ ഉന്നതോദ്യോഗസ്ഥനെ കാണിക്കുകയും അതിൽ എന്തോ ഉപയോഗക്ഷമത കണ്ട അദ്ദേഹം അതു നിർമ്മിക്കാൻ അനുമതിനൽകി.

മിലിട്ടറി എഞ്ചിനീയറിങ്ങ് എക്സ്പെരിമെന്റൽ ഏസ്റ്റാബ്ലിഷ്മെന്റിൽ 1941ലും 1942ലും ചേരുകയും ഈ പാലം ഉണ്ടാക്കി പരീക്ഷിക്കുകയും ചെയ്തു. പല തരത്തിൽ ഇതു നിർമ്മിച്ചുനോക്കി.

താങ്ങുപാലം, ആർച്ചു പാലം, പരന്ന ട്രസ്സ് പാലം എന്നിങ്ങനെ പല രൂപത്തിലും ഉണ്ടാക്കി. ആവോൺ നദിക്കും സ്റ്റൗർ നദിക്കും അടുത്തുള്ള ചതുപ്പു പ്രദേശത്തെ (സ്റ്റാൻപിറ്റ് ചതുപ്പുകൾ) കുറുകെമുറിക്കുന്ന മതർ സില്ലേഴ്സ് ചാനലിനു മുകളിലൂടെയാണിത് ആദ്യം നിർമ്മിച്ചത്. അത് അവിടെ ഒരു (50°43′31″N 1°45′44″W)പ്രവർത്തനക്ഷമമായ പാലമായി ഇന്നും പ്രവർത്തിച്ചുവരുന്നു.

അങ്ങനെ അനേകം പരീക്ഷണ നിർമ്മാണത്തിനും ഉപയോഗത്തിനും ശേഷം ഇത്, കോർപ്സ് ഓഫ് റോയൽ മിലിട്ടറി എഞ്ചിനീയേഴ്സിനായി നൽകപ്പെട്ടു. അങ്ങനെ ഉത്തര ആഫ്രിക്കയിൽ 1942ൽ ഉപയോഗിക്കപ്പെട്ടു. 1944 ആയപ്പൊഴെയ്ക്കും ഇതു കൂടുതൽ നിർമ്മിച്ചുതുടങ്ങി. യു. എസ്. ഇതിനു അനുമതി കൊടുത്തു. അവർ അവരുടേതായ രൂപകല്പനയാണ് പിന്തുടർന്നത്. ബെയിലിക്ക് തന്റെ കണ്ടുപിടിത്തതിന്, പ്രഭുപദവി ലഭിക്കുകയുണ്ടായി.

Baily Bridge history in Malayalam

The post ദുരന്തഭൂമിയിലും സൈനിക ആവശ്യത്തിനും സഹായകമാകുന്ന ബെയിലി പാലം appeared first on top1kerala.

കോട്ടയം ജില്ലയിലെ കടുത്തുരുത്തി മാന്നാറിൽ പ്രവർത്തിക്കുന്ന കടുത്തുരുത്തി കാർഷിക സർവീസ് സഹകരണ ബാങ്ക് ക്ലിപ്‌തം നമ്പർ 1233 നിക്ഷേപകരുടെ പണം തിരികെ നൽകുന്നില്ല എന്ന് വ്യാപക പരാതി. ഇടതുപക്ഷ ഭരണസമിതിയാണ് ബാങ്ക് ഭരിക്കുന്നത്. ലക്ഷങ്ങൾ നിക്ഷേപിച്ച ആളുകൾക്ക് ചെറിയൊരു തുക മാത്രമേ ഇവിടെ പിൻവലിക്കാൻ സാധിക്കുന്നുള്ളൂ.

ചികിത്സാ, വിവാഹ, വിദ്യാഭ്യാസ, ആവശ്യങ്ങൾക്കായി ആളുകൾ നിക്ഷേപങ്ങൾ പിൻവലിക്കാൻ ശ്രമിച്ചാലും സാധിക്കുന്നില്ല. കൂടാതെ ജീവനക്കാരുടെ ഭാഗത്തുനിന്ന് വളരെ മോശം പെരുമാറ്റവുമാണ് ഉണ്ടാകുന്നത്. പണം ലഭിക്കാതെ നിറകണ്ണുകളോടെ നിക്ഷേപകർ പോകുന്നത് ഇവിടെ നിത്യ സംഭവമാണ്.

രാഷ്ട്രീയ സ്വാധീനം ഉപയോഗിച്ച് തങ്ങളുടെ ഇഷ്ടക്കാർക്ക് വായ്പ അനുവദിച്ചതാണ് ഈ പ്രതിസന്ധിക്ക് കാരണം. സ്വന്തക്കാർക്കു നൽകിയ ഭീമമായ തുകയുടെ വായ്പ തിരിച്ചടവുകൾ കൃത്യമായി നടക്കാത്തത് പ്രതിസന്ധി വർധിപ്പിക്കുന്നു. പല വായ്പകളുടെയും ഈടിനേക്കാൾ കൂടിയ തുക വായ്‌പ അനുവദിച്ചിട്ടുണ്ട്.

ബാങ്ക് തന്നെ നടത്തുന്ന ചിട്ടിയുടെ അവസ്ഥയും വ്യത്യസ്തമല്ല. ചിട്ടി ലഭിച്ച ആളുകൾക്ക് മാസങ്ങൾ കഴിഞ്ഞാണ് പണം ഗഡുക്കളായി നൽകുന്നത്.

നിക്ഷേപങ്ങൾ നഷ്ടപ്പെടുകയില്ല എന്ന് സർക്കാർ പറയുമ്പോഴും അധ്വാനിച്ച് ഉണ്ടാക്കിയ തങ്ങളുടെ നിക്ഷേപങ്ങൾ സ്വന്തം ആവശ്യത്തിനായി ഉപയോഗിക്കാൻ പറ്റാത്ത ദയനീയ അവസ്ഥയിലാണ് നിക്ഷേപകർ.

മുഖ്യമന്ത്രി, സഹകരണ വകുപ്പ് മന്ത്രി, സഹകരണ വകുപ്പ് ഓംബുഡ്സ്മാൻ എന്നിവർക്ക് പരാതി നൽകിയിട്ടും തുടർനടപടി സ്വീകരിക്കുന്നില്ല എന്ന് നിക്ഷേപർ പറയുന്നു.

The post നിക്ഷേപകരുടെ പണം തിരികെ നൽകാതെ കടുത്തുരുത്തി കാർഷിക സർവീസ് സഹകരണ ബാങ്ക് appeared first on top1kerala.