ധ്യാൻ ശ്രീനിവാസനെ നായകനാക്കി രതീഷ് രഘുനന്ദൻ സംവിധാനം ചെയ്ത ചിത്രമായ ഉടലിലെ സ്ത്രീ കഥാപാത്രമാണ് ഷൈനി. ഈ കഥാപാത്രത്തെ ദുർഗ്ഗാ കൃഷ്ണയാണ് അവതരിപ്പിക്കുന്നത്.

സിനിമ റിലീസായതിന് ശേഷം ഇതിനെതിരെ വ്യപക വിമർശനങ്ങളാണ് ഉയർന്നത്. സിനിമയിൽ സ്ത്രീ കഥാപാത്രം ക്രൂരകൃത്യം ചെയ്തപ്പോൾ പലരും സംശയിച്ചുവെന്നും, ഒരു സ്ത്രീക്ക്ഇങ്ങനെയൊക്കെ ചെയ്യാനാകുമോ എന്ന് ചോദിച്ചുവെന്നും രതീഷ് രഘുനന്ദൻ പറയുന്നു.

സിനിമ കാണാതെ കേട്ടറിവു കൊണ്ട് മാത്രം ഉടലിൽ മുഴുവൻ സ്ത്രീ വിരുദ്ധതയെന്ന് ഡീഗ്രേഡ് ചെയ്ത യുവസംവിധായകൻ പോലുമുണ്ട്.

സത്യത്തിൽ ഷെെനി നിവൃത്തികേടുകൊണ്ട് ചെയ്തു പോയതല്ലേ. ഗ്രീഷ്മക്കോ, ലൈലക്കോ, ജോളിക്കോ ഇല്ലാതിരുന്ന നിവൃത്തികേടുകൊണ്ട് എന്നും സംവിധായകൻ പറഞ്ഞു.

ജീവിതത്തിലെ കൊലയാളികളുടെ, കൊലപാതകത്തിനുള്ള പ്രേരണകൾ കണ്ട് കണ്ട് പേടിയാകുന്നുവെന്നും സംവിധായകൻ കൂട്ടിച്ചേർത്തു.

ഫേസ്ബുക്കിന്‍റെ പൂർണ്ണരൂപം

സത്യത്തില്‍ എന്‍റെ ഷൈനി പാവമല്ലേ.. !
ഗ്രീഷ്മയെ, ലൈലയെ, ജോളിയെ, ഷെറിനെ, അനുശാന്തിയെ…
സമീപകാല സ്ത്രീ കുറ്റവാളികളെ കുറിച്ചാലോചിക്കുമ്പോള്‍ സത്യത്തില്‍ ഷൈനി നിവര്‍ത്തി കേടുകൊണ്ട് ചെയ്തു പോയതല്ലേ. മുകളില്‍ പറഞ്ഞ ആര്‍ക്കുമില്ലാതിരുന്ന നിവര്‍ത്തികേടുകൊണ്ട്…
ഉടല്‍ കണ്ട് ഒരു ചെറിയ വിഭാഗം ആളുകളെങ്കിലും സംശയിച്ചിരുന്നു, ചോദിച്ചിരുന്നു, ഒരു സ്ത്രീക്ക് ഇങ്ങനൊയൊക്കെ പെരുമാറാനാകുമോയെന്ന്. എന്തിനേറെ, സിനിമ കാണാതെ കേട്ടറിവു കൊണ്ട് മാത്രം ഉടലില്‍ മുഴുവന്‍ സ്ത്രീ വിരുദ്ധതയെന്ന് ഡീഗ്രേഡ് ചെയ്ത യുവസംവിധായകനെ പോലുമറിയാം. ചുറ്റുമൊന്നു നോക്കൂ, ഷൈനിയേക്കാള്‍ കടുകട്ടി മനസ്സുള്ളവരെ കാണാം. ഒരു തരിമ്പു പോലും സഹതാപമര്‍ഹിക്കാത്ത കരിമ്പാറ മനസ്സുള്ളവരെ. സ്‌നേഹനിരാസവും അവഗണനയും മടുപ്പിക്കുന്ന ജീവിതാന്തരീക്ഷവുമാണ് സിനിമയിലെ ഷൈനിയെ കൊലയാളിയാക്കിയത്. ജീവിതത്തിലെ കൊലയാളികളുടെ, കൊലപാതകത്തിനുള്ള പ്രേരണകള്‍ കണ്ട് പേടിയാകുന്നു!!!

The post സത്യത്തില്‍ എന്‍റെ ഷൈനി പാവമല്ലേ… നിവര്‍ത്തി കേടുകൊണ്ട് ചെയ്തു പോയതല്ലേ appeared first on top1kerala.

ഹ്രസ്വ -ദീർഘദൂര റൂട്ടുകളിൽ ദിനം തോറും നിരവധി ട്രെയിനുകൾ സഞ്ചരിക്കുന്നു.വിവിധ നിരക്കുകളിലാണ് ഇവയിലെ ടിക്കറ്റ് നിരക്കുകൾ.

എന്നാല്‍ യാത്രക്കാര്‍ക്ക് തികച്ചും സൗജന്യമായി യാത്ര വാഗ്ദാനം ചെയ്യുന്ന ഒരു ട്രെയിനുണ്ട് നമ്മുടെ രാജ്യത്ത്. അതും കഴിഞ്ഞ 73 വര്‍ഷമായി പ്രവര്‍ത്തിക്കുന്നു എന്ന് കേള്‍ക്കുമ്പോൾ ആശ്ചര്യം തോന്നാം. പക്ഷേ സംഭവം സത്യമാണ്.ഭക്ര-നംഗല്‍ ട്രെയിന്‍ എന്നാണ് ഇത് അറിയപ്പെടുന്നത്.

ഈ ട്രെയിനിലെ യാത്ര തികച്ചും സൗജന്യമാണ്. ഈ ട്രെയിന്‍ പഞ്ചാബിന്‍റെയും ഹിമാചല്‍പ്രദേശിന്‍റെയും അതിര്‍ത്തികളിലൂടെയാണ് ചൂളംകുത്തി പായുന്നത്. 25 ഗ്രാമങ്ങളുടെയും 300 ഓളം യാത്രക്കാരുടെയും പ്രധാന ആശ്രയമാണ് ഈ ട്രെയിന്‍.മലനിരകള്‍ക്കിടയിലൂടെ 13 കിലോമീറ്റര്‍ ദൂരമാണ് ട്രെയിന്‍ സഞ്ചരിക്കുന്നത്.

1948 ലാണ് ഭക്ര-നംഗല്‍ റെയില്‍ പാത പൂര്‍ത്തിയായത്. ലോകത്തിലെ ഏറ്റവും ഉയരം കൂടിയ സ്ട്രെയിറ്റ് ഗ്രാവിറ്റി അണക്കെട്ടായ ഭക്ര-നംഗല്‍ അണക്കെട്ട് നിര്‍മ്മിക്കുന്ന അവസരത്തിലാണ് ഇതിന്‍റെ സര്‍വീസ് ആരംഭിച്ചത്.ഭക്ര-നംഗൽ അണകെട്ടിന്‍റെ നിർമ്മാണ സമയത്തു ഭക്രയ്ക്കും നംഗലിനുമിടയിൽ മറ്റു ഗതാഗത സൗകര്യങ്ങൾ ഇല്ലായിരുന്നു.

അണകെട്ടിന്‍റെ നിർമ്മാണത്തിനാവശ്യമായ യന്ത്രങ്ങളും സാധന സാമഗ്രികളും തൊഴിലാളികളെയും കൊണ്ടുപോകുന്നതിനാണ് ഈ പാത നിർമ്മിച്ചത് . അണക്കെട്ടിന്‍റെ നിര്‍മ്മാണം 1963 -ല്‍ പൂര്‍ത്തിയായി.

ട്രെയിന്‍ ആദ്യം സ്റ്റീം എഞ്ചിനുകള്‍ ഉപയോഗിച്ചാണ് ഓടിയിരുന്നത്. പിന്നീട്1953-ല്‍, അമേരിക്കയില്‍ നിന്ന് മൂന്ന് പുതിയ എഞ്ചിനുകള്‍ ഇറക്കുമതി ചെയ്തു.അതിനു ശേഷം ഇന്ത്യൻ റെയിൽവേ അഞ്ച് പുതിയ മോഡൽ എൻജിനുകൾ അവതരിപ്പിച്ചിട്ടുണ്ടെങ്കിലും ട്രെയിന്‍ ഇപ്പോഴും 60 വര്‍ഷം പഴക്കമുള്ള ആ പഴയ എന്‍ജിന്‍ ഉപയോഗിച്ച്‌ തന്നെയാണ് ഓടുന്നത്.

എഞ്ചിന്‍ മണിക്കൂറില്‍ 18 മുതല്‍ 20 ലിറ്റര്‍ ഡീസലാണ് ഉപയോഗിക്കുന്നത്. കൊളോണിയല്‍ കാലത്തെ തടി ഉപയോഗിച്ചാണ് ട്രെയിനിലെ ബെഞ്ചുകള്‍ നിര്‍മ്മിച്ചിരിക്കുന്നത്. ട്രെയിനിന്‍റെ കോച്ചുകളാകട്ടെ കറാച്ചിയിലാണ് ഉണ്ടാക്കിയിരിക്കുന്നത്.

നംഗല്‍ റെയില്‍വേ സ്റ്റേഷനില്‍ നിന്ന് രാവിലെ 7:05 ന് പുറപ്പെടുന്ന ട്രെയിന്‍ രാവിലെ 8:20 ന് ഭക്രയില്‍ എത്തിച്ചേരും. ഭക്രയില്‍ നിന്ന് വൈകിട്ട് 3:05 ന് പുറപ്പെട്ട് 4:20 ന് നംഗല്‍ എത്തുന്നു.ദിവസേനയുള്ള യാത്രക്കാർക്കു പുറമേ ബി.ബി.എം.ബി. ജീവനക്കാർ, സ്‌കൂൾ വിദ്യാർഥികൾ, സന്ദർശകർ എന്നിവർ ഇപ്പോഴും ട്രെയിൻ സർവീസ് ഉപയോഗപ്പെടുത്തുന്നുണ്ട്.

ട്രെയിന്‍ സര്‍വീസിന്‍റെ മേല്‍നോട്ടം വഹിക്കുന്നത് ഭക്ര ബിയാസ് മാനേജ്‌മെന്‍റെ ബോര്‍ഡാണ്. 2011-ല്‍ ട്രെയിന്‍ ഓടിക്കാന്‍ വേണ്ടി വരുന്ന ചെലവ് കണക്കിലെടുത്ത് സൗജന്യ സേവനം അവസാനിപ്പിക്കാന്‍ ഒരാലോചന ഉണ്ടായിരുന്നു.

ഒരു വരുമാന സ്രോതസ്സ് എന്നതിനേക്കാള്‍ കൂടുതലായി പാരമ്പര്യത്തിന്‍റെയും , ചരിത്രത്തിന്‍റെയും ഭാഗമായ ഈ ട്രെയിന്‍ സർവീസ് അവസാനിപ്പിച്ചില്ല. അതിനാൽ ഇപ്പോഴും ഭക്ര-നംഗല്‍ ട്രെയിന്‍ ചൂളം കുത്തി കാലത്തിന്‍റെ പാതയില്‍ പഴമയുടെ ചരിത്രവും പേറി കുതിച്ച്‌ പായുന്നു.

അങ്ങനെ ചരിത്രത്തിന്‍റെ ഭാഗമായ ഭക്ര – നംഗൽ ട്രെയിൻ ടിക്കറ്റില്ലാതെ നിയമവിധേയമായി രാജ്യത്ത് യാത്ര ചെയ്യാവുന്ന മാർഗമായി അവിശേഷിക്കുന്നു.

The post എല്ലാ യാത്രക്കാർക്കും സൗജന്യ ട്രെയിൻ യാത്ര ! appeared first on top1kerala.

ഭാവി പ്രവചിക്കുന്ന വൈത്തീശ്വരൻ കോവിൽ. ഇന്നുവരെ ജനിച്ചിട്ടുള്ളതും ഇനി ജനിക്കാനിരിക്കുന്നതുമായ മുഴുവൻ ആളുകളുടെയും ജാതകങ്ങളും വിവരങ്ങളും ഇവിടുത്തെ പുരാതനങ്ങളായ ഓലക്കെട്ടുകളിൽ എഴുതിവെച്ചിട്ടുണ്ടെന്ന് ഭക്തർ വിശ്വസിക്കുന്നു. മനുഷ്യ ജീവിതത്തിലുണ്ടാകുന്ന എല്ലാ പ്രശ്‌നങ്ങൾക്കുമുള്ള പരിഹാരങ്ങൾ ഇവിടുത്തെ താളിയോല കെട്ടുകളിൽ ഒളിഞ്ഞു കിടക്കുന്നു എന്നാണ് വിശ്വാസം.

പക്ഷേ, ഇവിടെ എത്തി താളിയോല കെട്ടുകളിൽ നിന്നും സ്വന്തം ജാതകവും ഫലങ്ങളുമെല്ലാം കയ്യിൽ കിട്ടണമെങ്കിൽ അല്പം ബുദ്ധിമുട്ടാണ്. ഇവിടെ എത്തുവാൻ വിധിയുള്ളവർക്ക് മാത്രമേ എത്താനും താളിയോല കണ്ടെത്തുവാനും സാധിക്കുകയുള്ളൂ എന്നും വിശ്വാസമുണ്ട്.

ഈ ക്ഷേത്രത്തിലെ പ്രധാന മൂര്‍ത്തി ശിവന്‍ തന്നെയാണ്. വൈദ്യശാസ്ത്രത്തിന്റെ ഈശ്വരനായിട്ടാണ് ഇവിടുത്തെ സങ്കൽപ്പം. അതുകൊണ്ട് തന്നെ വൈത്തീശ്വരന്‍ എന്ന പേരും. ഔഷധവുമായി നില്ക്കുന്ന ഭഗവതിയുടെ പ്രതിഷ്ഠയും ഇവിടെയുണ്ട്.

ധന്വന്തരി പ്രതിഷ്ഠ വേറെ ആയും ഉണ്ട്. ഇവിടെ ചൊവ്വയുടെ രണ്ട് പ്രതിഷ്ഠയുണ്ട്. ഒന്ന് ഉത്സവമൂര്‍ത്തിയായി വൈദ്യനാഥസന്നിധിയ്ക്കടുത്തും മറ്റൊന്ന് പുറത്ത് പ്രദക്ഷിണവഴിയിലും.

ഇവിടത്തെ സുബ്രഹ്മണ്യപ്രതിഷ്ഠയ്ക്കും ഏറെ പ്രാധാന്യമുണ്ട്. ജ്യോതിഷത്തിലും ചൊവ്വയുടെ നാഥനായി സുബ്രഹ്മണ്യനെ പറഞ്ഞും കേട്ടിട്ടുണ്ട്.
ചൊവ്വയ്ക്ക് കുഷ്ഠരോഗം ബാധിച്ചപ്പോള്‍ ഇവിടെ ശിവനാണത്രെ അത് ചികിത്സിച്ച് മാറ്റിയത്.

സുബ്രഹ്മണ്യനും താരകാസുരനും ആയുള്ള യുദ്ധത്തില്‍ പരുക്കേറ്റ ദേവന്മാരുടെ സൈന്യത്തെ ചികിത്സിക്കാന്‍ ശിവന്‍ വൈദ്യഭാവത്തില്‍ വന്നു എന്നും സങ്കല്പം ഉണ്ട്.

വൈത്തീശ്വരൻ കോവിലിലെ അമ്പലക്കുളം സിദ്ധാമൃതമായി അറിയപ്പെടുന്നു. ഇവിടെ കുളിക്കുന്നത് അസുഖം വിശിഷ്യാ ത്വക്ക് രോഗങ്ങൾ ശമിക്കാൻ അത്യുത്തമമാണെന്ന് വിശ്വസിക്കുന്നു.

ക്ഷേത്രക്കുളത്തിൽ അമൃതിന്റെ സാന്നിധ്യമുണ്ടെന്നും അതിനാലാണ് അസുഖം മാറുന്നത് എന്നും വിശ്വസിക്കുന്നു.അംഗാരകന്‍ (ചൊവ്വ) അസുഖം മാറാന്‍ കുളിച്ചത് ഈ കുളത്തിലാണത്രെ.

ഈ ക്ഷേത്രവും വളരെ പഴക്കമേറിയതാണ്. 63 നായന്മാരില്‍ പ്രമുഖരായ അപ്പരും തിരുജ്ഞാനസംബന്ധരും മറ്റു പല ഭക്തന്മാരും ഈ ക്ഷേത്രത്തെ സ്തുതിച്ചിട്ടുണ്ട്. കര്‍ണ്ണാടകസംഗീതത്തിലെ ത്രിമൂര്‍ത്തികളില്‍ ഒരാളായ മുത്തുസ്വാമി ദീക്ഷിതരും ഈ ക്ഷേത്രത്തെ സ്തുതിച്ചതായി പറയപ്പെടുന്നു.

എന്നാൽ പിന്നെ ഭാവി അറിഞ്ഞിട്ടു തന്നെ കാര്യം, വൈത്തീശ്വരത്തേക്ക് വിട്ടേക്കാം എന്നു കരുതണ്ട. അത്ര എളുപ്പമല്ല കാര്യങ്ങൾ. ജന്മരഹസ്യങ്ങൾ അറിയുവാൻ ആദ്യം ചെയ്യേണ്ടത് തള്ളവിരലിന്റെ മുദ്ര കൊടുക്കുകയാണ്. അതുപയോഗിച്ച് തിരഞ്ഞാണ് താളിയോല തിരഞ്ഞെടുക്കുക.

പേരിന്റെ അക്ഷരങ്ങളിൽ തുടങ്ങി മാതാപിതാക്കളുടെ പേരും കുടംബാംഗങ്ങളുടെ പേരും വീട്ടുപേരും ജോലിയുമടക്കം പറയുന്നവരുണ്ട്. എന്നാൽ വിധിവൈപരീത്യത്തിന് പാത്രമായി ഭാവി രഹസ്യം കണ്ടെത്താനാകാതെ മടങ്ങുന്നവരും ഏറെയാണ്.

അഗസ്ത്യമുനിയാണ് താളിയോല ഗ്രന്ഥങ്ങൾ രചിച്ചിരിക്കുന്നതെന്നാണ് വിശ്വാസം. നാഡീ ജ്യോതിഷത്തിന്റെ ആചാര്യനായാണ് അഗസ്‌ത്യൻ അറിയപ്പെടുന്നത്.

ഒരിക്കൽ ശിവൻ പാർവതി ദേവിയോട് പുതിയ കാലത്ത് ജനിക്കുന്ന ആളുകളെക്കുറിച്ച് പറഞ്ഞുവത്രെ. ഇത് ഭൂമിയിൽ വച്ച് ധ്യാനത്തിൽ കണ്ട അഗസ്ത്യമുനി ഇതെല്ലാം താളിയോലകളിൽ പകർത്തി വച്ചു എന്നും. അതിന്റെ പകർപ്പുകളാണ് ഇപ്പോൾ നാഡീ ജ്യോതിഷത്തിൽ ഉപയോഗിക്കുന്നത് എന്നുമാണ് വിശ്വാസം.

വൈത്തീശ്വരനോടുള്ള പ്രാർഥന എല്ലാ രോഗങ്ങളും സുഖപ്പെടുത്തും എന്നാണ് വിശ്വാസം. നവഗ്രഹ ക്ഷേത്രങ്ങളിൽ ചൊവ്വയുടെ ക്ഷേത്രം കൂടിയാണിത്.

വിടുത്തെ , ഇതിൽ മുങ്ങിക്കുളിച്ചാൽ എല്ലാ വിധത്തിലുമുള്ള ത്വക്ക് രോഗങ്ങളും മാറുമെന്നും ഭക്തർ വിശ്വസിക്കുന്നു.

പത്താം നൂറ്റാണ്ടോടുകൂടിയാണ് ഈ ക്ഷേത്രം നിർമ്മിക്കപ്പെട്ടത് എന്നാണ് വിശ്വാസം. അഞ്ച് രാജഗോപുരങ്ങളോട് ചേർന്ന് നിർമ്മിച്ചിരിക്കുന്ന ഈ ക്ഷേത്രം കുലോത്തുംഗ ചോളന്റെ കാലത്താണ് നിർമ്മിക്കപ്പെട്ടത്.

The post ഭാവിയെകുറിച്ചു അറിയാൻ താൽപര്യം ഉണ്ടോ? appeared first on top1kerala.

ദക്ഷിണേന്ത്യൻ സംസ്ഥാനങ്ങളിൽ നവരാത്രി കാലങ്ങളിൽ ദേവീദേവന്മാരുടെ ബൊമ്മകൾ (പാവകൾ) അണിനിരത്തി നടത്തുന്ന ഒരു ആചാരമാണ് ബൊമ്മക്കൊലു. ‘പാവ’ എന്നർത്ഥം വരുന്ന ‘ബൊമ്മ’ എന്ന വാക്കും, ‘പടികൾ’ എന്നർത്ഥം വരുന്ന ‘കൊലു’ എന്ന വാക്കും ചേർന്നാണ് ബൊമ്മക്കൊലു എന്ന പദം ഉണ്ടായത്.തിന്മയുടെ മേൽ നന്മയുടെ വിജയത്തിന്‍റെ ഓർമപ്പെടുത്തലുമായാണ് ബൊമ്മക്കൊലുക്കൾ വീടുകളിൽ തയ്യാറാക്കുന്നത്.

ഒരുക്കുന്ന രീതി

ബൊമ്മക്കൊലുവിന് 3, 5,7,9 എന്നിങ്ങനെ ഒറ്റസംഖ്യ വരുന്ന പടികൾ കെട്ടി അതിൽ ദേവിദേവന്മാരുടെ മൺ പ്രതിമകൾ വയ്ക്കും. ഏറ്റവും മുകളിലെ പടിയിൽ കുടത്തിൽ മാവില, മഞ്ഞൾ പുരട്ടി അലങ്കരിച്ച കുടുമയുള്ള നാളികേരം, പച്ചരി, പച്ച മഞ്ഞൾ എന്നിവ വച്ചുള്ള കുംഭത്തിനാണ് ഏറ്റവും പ്രാധാന്യം. കുഭം വയ്ക്കുന്നതിനും ചില പ്രത്യേക തകൾ ഉണ്ട്. ചൊവ്വ, ശനി ദിവസങ്ങളിലും രാഹുകാല സമയത്തും കുംഭം വയ്ക്കുകയില്ല.

പടികൾക്കു മുകളിൽ തുണിവിരിച്ചശേഷം ദേവീദേവൻമാരുടെ ബൊമ്മകൾ അവയുടെ വലിപ്പത്തിനും സ്ഥാനത്തിനും അനുസരിച്ച് നിരത്തിവെക്കുന്നു. പുരാണത്തിലെ കഥാപാത്രങ്ങളും കഥകളുമാണ് ബൊമ്മക്കൊലുക്കളിൽ തയ്യാറാക്കുന്നത്.ഗണപതി, ആദിപരാശക്തിയുടെ ഒൻപത് രൂപങ്ങൾക്കൊപ്പം ശ്രീരാമപട്ടാഭിഷേകം, അഷ്ടലക്ഷ്മി, ശിവ പാർവതി, ഗുരുവായൂരപ്പൻ, ദശാവതാരം എന്നിവയും ബൊമ്മക്കൊലുവിലുണ്ടാവും.

ദേവിയുടെ ഒൻപത് ഭാവങ്ങളെ പൂജിക്കുന്നു

ബൊമ്മക്കൊലു ഒരുക്കുന്നതും ദേവിയെ പൂജിക്കുന്നതും സ്ത്രീകളാണ്. ആദ്യ മൂന്നു ദിവസങ്ങളിൽ ശൈലപുത്രി, ബ്രഹ്മചാരിണി, ചന്ദ്രഘണ്ഡാ എന്നീദേവതകളെ ദുർഗ്ഗദേവി(പാർവതി) സങ്കല്പത്തിലും അടുത്ത മൂന്ന് ദിവസം കുഷ്മാണ്ഡ, സ്കന്ദമാതാ, കാർത്യായനി എന്നീ ദേവതകളെ ലക്ഷ്മിദേവി സങ്കല്പത്തിലും അവസാനത്തെ മൂന്ന് ദിവസം കാലരാത്രി, മഹാഗൗരി, സിദ്ധിദാത്രി എന്നീ ദേവതകളെ സരസ്വതി ദേവി സങ്കല്പത്തിലുമാണ് പൂജ നടത്തുന്നത്. 9 ദിവസം ബൊമ്മക്കൊലു വെച്ച് പൂജിക്കാൻ സാധിക്കാത്തവർക്ക് അവസാന 3 ദിവസങ്ങളിൽ ബൊമ്മക്കൊലു വച്ച് പൂജിക്കാവുന്നതാണ്.സ്ത്രീകൾക്ക് ഏറെ പ്രാധാന്യമുള്ള ഒരു ആഘോഷമാണ് നവരാത്രി.

നവരാത്രിയുടെ ആരംഭത്തോടെ ഒരുക്കുന്ന ബൊമ്മക്കൊലുവിന് എല്ലാ ദിവസവും രാവിലെയും വൈകുന്നേരം നിവേദ്യത്തോടു കൂടിയ പൂജയും ദുർഗ്ഗാഷ്ടമി ദിവസവും മഹാനവമി ദിവസവും മൂന്നുനേരം പൂജയും വിജയദശമി ദിവസം രാവിലത്തെ പൂജയോടെ ബൊമ്മക്കൊലു മാറ്റുകയും ചെയ്യുന്നു. മൂന്നുനേരം പൂജയുള്ള ദിവസങ്ങളിൽ രാവിലത്തെ പൂജയ്ക്ക് പാൽപ്പായസവും വെറ്റില പാക്കും ഉച്ചയ്ക്ക് തൈര്, നാരങ്ങ, പുളിയോദര, തേങ്ങ തുടങ്ങിയ സാദങ്ങളും വൈകുന്നേരം വേവിച്ച വൻപയർ, ചെറുപയർ, കടല, തുടങ്ങിയ ധാന്യങ്ങൾ ഉപ്പോ മധുരമോ ചേർത്ത് നിവേദിക്കുന്നു. ഈ നിവേദ്യം ചുണ്ടൽ എന്നാണ് അറിയപ്പെടുന്നത്.എല്ലാ ദിവസവും വൈകുന്നേരം പൂജയ്ക്ക് സംഗീതം, നൃത്തം, വാദ്യം, എന്നിവ കൊണ്ട് അർച്ചനകൾ നടത്തുന്നു.

ദുർഗാഷ്ടമി ദിവസം ആയുധപൂജയും മഹാനവമി ദിവസം വിദ്യാ പൂജയും നടത്തുന്നു. മഹാനവമി ദിവസം 9 സ്ത്രീകളെ ദേവിയുടെ ഒമ്പത് നാമങ്ങൾ കൊണ്ട് പൂജിച്ച് ഉപഹാരങ്ങൾ നൽകി സന്തോഷിപ്പിക്കുന്നു. അന്നേദിവസം തന്നെ കന്യകമാരായ ബാലികമാരെ ഈ സങ്കല്പത്തിൽ പൂജിച്ച് ഉപഹാരങ്ങൾ നല്കി സന്തോഷിപ്പിക്കുന്നു. ബന്ധുക്കൾക്കും സുഹൃത്തുക്കൾക്കും ബാലിക മാർക്കും നവരാത്രി ദിനങ്ങളിൽ താമ്പൂലം നൽകുന്ന പതിവും ഉണ്ട്.

ഐശ്വര്യവും ക്ഷേമവും അനുഗ്രഹവും ദേവി നൽകുമെന്ന സങ്കല്പത്തിനുപരിയായി കൂടിച്ചേരലിന്‍റെയും ഒത്തൊരുമയുടെയും സൗഹാദ്ദത്തിൻ്റെയും ഒരു ആഘോഷം കൂടിയാണ് നവരാത്രി ആഘോഷവും ബൊമ്മക്കൊലു ഒരുക്കലും

കടപ്പാട് : ലക്ഷ്മി സുബ്രഹ്മണ്യയ്യർ

The post ബൊമ്മക്കൊലു: നന്മയുടെ വിജയത്തിന്‍റെ ഓർമപ്പെടുത്തൽ appeared first on top1kerala.

ഈ പ്രതിസന്ധിയിൽ സ്വരാജ് റൗണ്ടിലേക്ക് ഇത്തവണ കൂട്ടത്തോടെയുള്ള പുലിയിറക്കമുണ്ടാകില്ല.തെരെഞ്ഞെടുത്ത ആറു പുലികൾ മാത്രം പങ്കെടുക്കും.

കോവിഡ് പ്രോട്ടോകോൾ പാലിച്ച് നടത്തുന്ന പരിപാടിയിലേക്ക് പൊതു ജനങ്ങൾക്ക് പ്രവേശനമുണ്ടാകില്ല. വൈകീട്ട് മൂന്ന് മുതൽ നാല് വരെ ഫേസ് ബുക്ക്‌ ഇന്ത്യയുടെ ഒഫീഷ്യൽ പേജിലൂടെ പുലിക്കളി കാണാനാകും.ഫേസ്ബുക്ക് ഇന്ത്യ നേരിട്ട് ആദ്യമായി പുലികളി സംപ്രേഷണം ചെയ്യുന്നു എന്ന പ്രത്യേകതയും ഇത്തവണത്തെ പുലികളിക്കുണ്ട്.  കോവിഡ് മാനദണ്ഡങ്ങൾ പാലിക്കണമെന്ന സന്ദേശവും ഇത്തവണ പുലികൾ നൽകും. . വിയ്യൂർ പുലിക്കളി സെന്ററാണ് സ്വരാജ് റൗണ്ടിൽ ഒറ്റപ്പുലിയെ ഇറക്കുന്നത്.

  2020 ൽ പുലികളി പേരിന് മാത്രമേ നടത്തിയുള്ളൂ. അതിനു മുൻപ് വരെ വിവിധ ദേശങ്ങളിൽ നിന്നായി നൂറുകണക്കിന് പുലി വേഷധാരികൾ ആണ്  ഇതിൽ പങ്കെടുത്തു കൊണ്ടിരുന്നത്. വിവിധ നിശ്ചലദൃശ്യങ്ങളും  ഓണം സമാപനത്തോടനുബന്ധിച്ച ഈ പരിപാടിയിൽ  പങ്കെടുത്തിരുന്നു.  വിദേശികളും  സ്വദേശികളുമായി  ലക്ഷക്കണക്കിന് ആളുകളാണ്  ഈ പുലികളി  കാണാൻ എത്തിയിരുന്നത്.സ്ത്രീകളും കുട്ടികളും  ഉൾപ്പെടെ  നിരവധി  പുലി വേഷധാരികളാണ് മുൻവർഷങ്ങളിൽ പങ്കെടുത്തു കൊണ്ടിരിക്കുന്നത്.  തൃശൂർ പൂരം കഴിഞ്ഞാൽ  തൃശൂരുകാരുടെ  ഏറ്റവും വലിയ വലിയ ആഘോഷമാണ് തൃശ്ശൂർ പൂരത്തോടനുബന്ധിച്ച് നടത്തുന്ന  പുലികളി.

കേരളത്തിന്റെ സാംസ്കാരിക തലസ്ഥാനമായ  തൃശ്ശൂരിൽ  രണ്ടു വർഷമായി  പ്രധാന ഉത്സവങ്ങളായ തൃശ്ശൂർ പൂരവും  പുലികളിയും നടക്കാത്ത സങ്കടത്തിലാണ് ഇവിടുത്തെ നാട്ടുകാർ. വരുംവർഷങ്ങളിൽ  ഈ പ്രതിസന്ധികൾ മാറി പൂർണ്ണ രീതിയിലുള്ള ഉള്ള ആഘോഷങ്ങൾ നടത്താൻ സാധിക്കുമെന്ന ശുഭാപ്തി വിശ്വാസത്തിലാണ് ഇന്നാട്ടുകാർ.

The post തൃശ്ശൂരിൽ ഇന്ന് പുലി ഇറങ്ങും.ഓൺലൈൻ സംപ്രേക്ഷണം ഫേസ്‌ബുക്ക് നേരിട്ട്. appeared first on top1kerala.

ക്ഷേത്രചരിത്രം

5 സഹസ്രാബ്ദത്തിലേറെ പഴക്കമുള്ളതാണ് കല്ലിൽ ക്ഷേത്രം. പ്രകൃതിയുടെ വശ്യസൗന്ദര്യം കൊണ്ട് അനുഗൃഹീതമാണ് ക്ഷേത്രം കുടി കൊള്ളുന്ന കല്ലില്‍ മലയും അതിനു ചുറ്റുമുള്ള പ്രദേശങ്ങളും.ക്ഷേത്രത്തിനു ചുറ്റും 28 ഏക്കറോളം പരന്നു കിടക്കുന്ന പ്രദേശം മുന്‍പ് വിജനമായ വനപ്രദേശമായിരുന്നു. പ്രതാപികളായിരുന്ന കല്ലില്‍ പിഷാരം വകയായിരുന്നു ഈ ക്ഷേത്രം. ഭക്തജനങ്ങളെയും ചരിത്രാന്വേഷകരെയും ഒന്നുപോലെ ആകര്‍ഷിക്കാന്‍ പോന്നതാണ് ഈ പ്രദേശത്തിന്‍റെ വശ്യ ചൈതന്യം. മറ്റു പല ക്ഷേത്രങ്ങളെയും പോലെ പ്രാരംഭ ദശയില്‍ ഇതും ജൈനക്ഷേത്രങ്ങളില്‍ ഒന്നായിരുന്നു.

ജൈനമതത്തിലെ തീര്‍ത്ഥങ്കരനായിരുന്ന വര്‍ദ്ധമാന മഹാവീരന്‍റെയും പാര്‍ശ്വനാഥന്‍റെയും പത്മാവതിദേവിയുടെയും പ്രതിഷ്ഠകള്‍, ഇത് ജൈനക്ഷേത്രമായിരുന്നു എന്ന ചരിത്രവസ്തുതയ്ക്ക് പിന്‍ബലം നല്കുന്നു. ഒരു പക്ഷേ ജൈന സന്യാസിമാര്‍ തപസ് അനുഷ്ഠിച്ചിരുന്ന പ്രദേശമായിരുന്നിരിയ്ക്കണം പിന്നീട് ക്ഷേത്രമായി പരിണമിച്ചത്. ഒമ്പതാം നൂറ്റാണ്ടില്‍ ഇത് ഹിന്ദുക്ഷേത്രമായി മാറിയെന്നു കരുതപ്പെടുന്നു. ഇന്നും ജൈനമതസ്ഥര്‍ ഇവിടെ ആരാധനയ്ക്കെത്തുക പതിവാണ്.

ക്ഷേത്രഐതിഹ്യം

ശ്രീകോവിലിന്‍റെ മേല്‍ക്കൂരയായി നിലം തൊടാതെ നില്‍ക്കുന്ന ഭീമാകാരമായ പാറയുടെ പ്രകൃതിദത്തമായ അത്ഭുദ ദൃശ്യമാണ് ദേവിയ്ക്ക് ദിവ്യ പരിവേഷമായി നിലകൊള്ളുന്നത്. ക്ഷേത്രത്തിന്‍റെ ശ്രദ്ധാകേന്ദ്രമായ ഭീമന്‍ പാറ അന്തരീക്ഷത്തില്‍ ഉയര്‍ന്നു നില്‍ക്കുന്നതിനെക്കുറിച്ചു പല ഐതിഹ്യങ്ങളുമുണ്ട്. ഒരു കാലത്ത് നിബിഡ വനമായിരുന്ന ഈ പ്രദേശത്ത് വനവിഭവങ്ങള്‍ ശേഖരിയ്ക്കാന്‍ എത്തിയവര്‍ കാനനമധ്യത്തില്‍ ദേവീ ചൈതന്യം തുടിയ്ക്കുന്ന സുന്ദരിയായൊരു സ്ത്രീ കല്ലുകൊണ്ട് അമ്മാനമാടി കളിയ്ക്കുന്നത് കണ്ടുവത്രേ.

വനമധ്യത്തില്‍ കണ്ട സുന്ദരി ആരെന്നറിയാന്‍ ആകാംക്ഷയോടെ അവര്‍ അടുത്തു ചെന്നപ്പോഴേയ്ക്കും ആ സുന്ദരി അമ്മാനമാടിക്കൊണ്ടിരുന്ന കല്ലുകള്‍ മറയാക്കി ഗുഹയില്‍ ഒളിച്ചു. ആ സുന്ദരരൂപിണി കല്ലില്‍ ഭഗവതിയായിരുന്നു. അമ്മാനമാടിയപ്പോള്‍ മുകളിലേയ്ക്കു പോയ കല്ല് മേല്‍ക്കൂരയായും താഴേക്കു പതിച്ച കല്ല് ഇരിപ്പിടമായും മാറിയെന്നും ഐതിഹ്യം.അന്തരീക്ഷത്തിൽ തലയുയർത്തി നിൽക്കുന്ന ഈ പാറ 15 ആനകൾ ഒന്നിച്ച് വലിച്ചാൽ പോലും അനങ്ങില്ല എന്ന് പറയപ്പെടുന്നു

പ്രതിഷ്ഠ

ദുർഗ ദേവിയാണ് ഈ ക്ഷേത്രത്തിലെ പ്രധാന പ്രതിഷ്ഠ. ഒരു പാറ തുരന്നുണ്ടാക്കിയ ഗുഹയിലാണ് ഭഗവതി പ്രതിഷ്ഠ. ജൈനമതത്തിലെ യക്ഷിയായ പത്മാവതിയുടെ വിഗ്രഹമാണ് ഇതെന്ന് പറയപ്പെടുന്നു. ബ്രഹ്മാവിന്‍റെ പ്രതിഷ്ഠ പാറയുടെ മുകളിലാണ്. ബ്രഹ്മാവിന്‍റെ കൂടെ ശിവനും വിഷ്ണുവും ഉണ്ടെന്നാണ് സങ്കൽപം.അതിനാൽ ശിവനും വിഷ്ണുവിനും ഒപ്പം ബ്രഹ്മാവിനെയും ഇവിടെ പൂജിക്കുന്നു. ബ്രഹ്മാവിഷ്ണുമഹേശ്വരന്മാരെ പൂജിക്കുന്ന അപൂർവം ക്ഷേത്രങ്ങളിൽ ഒന്നാണിത്.ഉപദേവന്മാരായി ഗണപതി, ശാസ്താവ്, കരിനാഗയക്ഷി എന്നിവരുമുണ്ട്.

അടുത്തകാലംവരെ ഉച്ചപൂജയോടെ പൂജകൾ നടയടയ്ക്കുമായിരുന്നു. വൈകുന്നേരങ്ങളിൽ പൂജ പതിവില്ലായിരുന്നു. രാത്രികാലങ്ങളിൽ മേൽശാന്തിക്ക് കാടിന് നടുവിലുള്ള ക്ഷേത്രത്തിൽ എത്തി പൂജകൾ നിർവഹിക്കാനുള്ള വിഷമം പരിഗണിച്ചായിരിക്കും ഇത് . അന്നാളുകളിൽ സന്ധ്യാ പൂജകൾ കല്ലിൽ ഷാരത്ത്‌ ആണ് കഴിച്ചിരുന്നത്. എന്നാൽ ഏതാനും വർഷങ്ങളായി ഉച്ചപൂജയ്ക്ക് ശേഷം നടയടയ്ക്കുന്ന ക്ഷേത്രം വൈകുന്നേരത്തെ പൂജയ്ക്കായി വീണ്ടും തുറക്കുന്നുപോരുന്നു. അത്താഴപൂജയ്ക്കു ശേഷം 7.30 ഓടെ നടയടയ്ക്കുന്നു.

ഈ പൂജക്രമം നിലവിൽ വരുന്നതിനു മുമ്പ് വൃശ്ചിക മാസത്തിലെ കാർത്തികയ്ക്ക് കൊടിയേറുന്ന തൃക്കാർത്തിക മഹോത്സവത്തിനു മാത്രമേ വൈകുന്നേരം പൂജ ഉണ്ടായിരുന്നുള്ളൂ.
ക്ഷേത്രത്തിലെ തന്ത്രി നെടുമ്പിള്ളി തരണനെല്ലൂർ മനക്കാരാണ്. നേരത്തെ കല്ലിൽ പിഷാരോടി കുടുംബം വകയായിരുന്നു ഈ ക്ഷേത്രം.ഇടയ്ക്ക് തിരുവനന്തപുരത്തുള്ള ചെങ്കോട്ടുകോണം ശ്രീരാമദാസ ആശ്രമം ക്ഷേത്രഭരണം ഏറ്റെടുക്കുകയും പിന്നീട് പിഷാരത്ത് ദേവസ്വം ഭരണം നിർവഹിച്ചു തുടങ്ങി.

പ്രധാന വഴിപാടുകൾ

ക്ഷേത്രത്തിൽ ഇടി തൊഴൽ ആണ് പ്രധാന വഴിപാട്.വൃശ്ചികമാസത്തിലെ കാർത്തിക നാളിൽ നടത്തുന്ന ഈ വഴിപാട് വ്രതമനുഷ്ഠിച്ച് മാരാർ വാദ്യമേളങ്ങളോടെ വെറ്റില,അടയ്ക്ക,ചുണ്ണാമ്പ്, മഞ്ഞൾ എന്നീ ദ്രവ്യങ്ങൾ ഉരലിലിട്ട് ഇടിച്ച് ഉണ്ടാക്കുന്ന കൂട്ട് ദേവിക്ക് സമർപ്പിച്ചത്തിനുശേഷം ഭക്തജനങ്ങൾക്ക് പ്രസാദമായി നൽകുന്നു. വർഷത്തിലൊരിക്കൽ മാത്രമേ ഈ വഴിപാട് നടത്താറുള്ളൂ. ഇവിടുത്തെ പ്രധാനപ്പെട്ട രണ്ട് വഴിപാടുകളാണ് കല്ല് നേർച്ചയും ചൂൽ നേർച്ചയും.

സ്ത്രീകൾക്ക് മുടി വളരുവാനും പുരുഷന്മാർക്ക് കുടുംബത്തിലെ അസ്വസ്ഥതകൾ മാറുവാനുമാണ് ചൂൽ നേർച്ച നടത്തുന്നത്. ഇരുമ്പ് തൊടാതെ ഓല കൊണ്ട് ചൂൽ നിർമ്മിച്ച് ക്ഷേത്രത്തിൽ സമർപ്പിക്കുന്നതാണ് ചൂൽ നേർച്ച. പാതി വഴിയിൽ മുടങ്ങിയ വീടുപണി പൂർത്തിയാകുവാനാണ് കല്ല് നേർച്ച നടത്തുന്നത്. പണി നടക്കുന്ന വീട്ടിൽ നിന്നും രണ്ട് മൂന്ന് കല്ലുകൾ കൊണ്ടുവന്ന് ക്ഷേത്രത്തിലെത്തിച്ച് പ്രാർഥിച്ചാൽ ഒരു വർഷത്തിനുള്ളിൽ പണി പൂർത്തിയാകും. ആഗ്രഹിച്ച കാര്യം സാധിക്കുന്നവർ ഇവിടെ വന്ന് വീണ്ടും നന്ദിയർപ്പിച്ച് വഴിപാട് നടത്തി പ്രാർഥിക്കാറുമുണ്ട്.

മറ്റു ക്ഷേത്രങ്ങളിൽ നിന്നും വ്യത്യസ്തമായി എഴുന്നള്ളിപ്പുകൾക്ക് പിടിയാന ആണ് ഭഗവതിയുടെ തിടമ്പേറ്റുന്നത്. കല്ലിൽ പിഷാരോടിയുടെ പിന്മുറക്കാരായ
ഒല്ലി സമുദായാംഗങ്ങൾ പാർശ്വനാഥൻ, മഹാവീരൻ, പത്മാവതി ദേവി എന്നിവരെ ഇവിടെ ആരാധിക്കുന്നു

ഒരു വലിയ പാറയുടെ മുകളിൽ പണിത ഈ ക്ഷേത്രത്തിൽ എത്തുവാൻ 120 പടികൾ കയറണം. എറണാകുളം ജില്ലയിൽ പെരുമ്പാവൂരിൽ നിന്നും 10 കിലോമീറ്റർ അകലെ മേതലയിലാണ് ഈ ക്ഷേത്രം സ്ഥിതിചെയ്യുന്നത് . എം.സി. റോഡില്‍ പുല്ലുവഴി, കീഴില്ലം എന്നീ സ്ഥലങ്ങളില്‍ നിന്നും ആലുവ – മൂന്നാര്‍ റോഡില്‍ കുറുപ്പംപടി, ഓടയ്ക്കാലി എന്നീ സ്ഥലങ്ങളില്‍ നിന്നും ക്ഷേത്രത്തില്‍ എത്തിച്ചേരാം. വിളിച്ചാൽ വിളിപ്പുറത്തു എത്തുന്ന ആശ്രയിക്കുന്നവർക്ക് സർവ്വാഭിഷ്ടവരദായിനിയാണ് ഈ ക്ഷേത്രത്തിലെ ദേവി എന്ന് അനുഭവസ്ഥർ പറയുന്നു.

The post നിലം തൊടാതെ നിൽക്കുന്ന പാറയും അത്ഭുതങ്ങൾ നിറഞ്ഞ ഗുഹാ ക്ഷേത്രവും – മേതല കല്ലിൽ ഗുഹാക്ഷേത്രം appeared first on top1kerala.

അക്ഷര നഗരി എന്നറിയപ്പെടുന്ന കോട്ടയം ജില്ലയിൽ ചെറുതും വലുതും ആയ നിരവധി വിനോദ സഞ്ചാര കേന്ദ്രങ്ങളുണ്ട്. ഉത്തരവാദിത്വടൂറിസത്തിന്‍റെ മാതൃക ആയ കുമരകം മുതൽ സഞ്ചാരികളുടെ ഇഷ്ട കേന്ദ്രം ആയ ഇല്ലിക്കൽ കല്ല് വരെ കോട്ടയം ജില്ലയിൽ സ്ഥിതി ചെയ്യുന്നു.

ഇലവീഴാപൂഞ്ചിറ

കോട്ടയം ജില്ലയിലെ ഒരു ഹിൽ സ്റ്റെഷനാണ് മേലുകാവ് വില്ലേജിൽ സ്ഥിതി ചെയ്യുന്ന ഇലവീഴാപൂഞ്ചിറ.കോട്ടയ-ഇടുക്കി ജില്ലാ അതിർത്തിയിലാണ് ഇത് സ്ഥിതിചെയ്യുന്നത്. ഇലപൊഴിയും കാടുകളും മരങ്ങളും ആണ് ഇവിടുത്തെ പ്രത്യേകത . കോടമഞ്ഞിന്‍റെയും തണുപ്പിന്‍റെയും വിഹാര കേന്ദ്രമാണ് ഇലവീഴാപൂഞ്ചിറ.

ഈരാറ്റുപേട്ട-തൊടുപുഴ റൂട്ടിൽ സഞ്ചരിച്ചു 6km അകത്തോട്ടു പോയാൽ ഇലവീഴാ പൂഞ്ചിറയിൽ എത്താം. 4 km ഓഫ്‌റോഡ് ആണ് . ജീപ്പ് സർവീസ് ലഭ്യമാണ്. ഇലവീഴാപൂഞ്ചിറയുടെ മുകളിൽ നിന്ന് മലങ്കര ഡാമിന്‍റെ വിദൂര ദൃശ്യങ്ങൾ കാണാം. പൂഞ്ചിറയിൽ ഒരു പോലീസ് സ്റ്റേഷനുംകൺട്രോൾറൂമുംപ്രവർത്തിക്കുന്നുണ്ട്.

അയ്യൻപാറ
കോട്ടയം ജില്ലയിലെ തന്നെ സൂര്യാസ്തമയം മികച്ച രീതിയിൽ കാണുവാൻ സാധിക്കുന്ന സ്ഥലം ആണ് അയ്യൻപാറ. ഇടുക്കി-തൊടുപുഴ റൂട്ടിൽ സഞ്ചരിച്ചു മങ്കൊമ്പ് ജംഗ്ഷനിൽ നിന്ന് തിരിഞ്ഞാണ് അയ്യൻപാറയിലേക്കു പോകുന്നത്. പേരുപോലെ തന്നെ പാറക്കൂട്ടങ്ങൾ ആണ് ഇവിടെ ഉള്ളത്. അയ്യൻപാറയിൽ ഒരു പള്ളിയും, അമ്പലവും ഉണ്ട്.

പാറകൾക്കു ഇടയിൽ വളരുന്ന പുൽമേടുകൾ, വിവിധ തരം മരങ്ങൾ എന്നിവ മനോഹാരിത ചൊരിയുന്നു.രാവിലെയും, വൈകുന്നേരങ്ങളിലും കുടുംബ ത്തോടൊപ്പവും അല്ലാതെയും ധാരാളം ആളുകൾ ഇവിടെ എത്താറുണ്ട്. ഇല്ലിക്കൽ കല്ല്,ഈരാറ്റുപേട്ട ടൗൺ, വല്യച്ഛൻ മല, ഇലവീഴാപൂഞ്ചിറ എന്നിവയുടെ വിദൂര ദൃശ്യങ്ങൾ അയ്യൻപാറയിൽ നിന്ന് കാണാൻ സാധിക്കും.

വല്യച്ഛൻ മല
ഈരാറ്റുപേട്ടയിലെ അരുവിത്തറ പള്ളിയോടു ചേർന്നുള്ള കുരിശുമല ആണ് വല്യച്ഛൻ മല. കേരളത്തിലെ ഏറ്റവും വലിയ കുരിശ് ഇവിടാനുള്ളത്..
മല അടിവാരത്തു നിന്ന് കാൽനടയായും, സ്വന്തം വാഹനത്തിലും മലയുടെ മുകളിൽ എത്താം. വൈകുന്നേരങ്ങളിൽ മലയുടെ മുകളിൽ നിന്ന്, ലൈറ്റുകൾ ശോഭ പകരുന്ന ഇരാറ്റുപേട്ടയുടെ ഭംഗിയും ആസ്വദിക്കാം.

വാഗമൺ

കോട്ടയം-ഇടുക്കി ജില്ലകളുടെ അതിർത്തിയിൽ സ്ഥിതി ചെയ്യുന്ന ഒരു ഹിൽ സ്റ്റേഷനാണ് വാഗമൺ. ഈരാറ്റുപേട്ടയിൽ നിന്നും ഏകദേശം 30 കിലോമീറ്റർ ദൂരമുണ്ട് ഈ മനോഹരമായ പ്രദേശത്തേക്ക്.

തേയിലത്തോട്ടങ്ങൾ, പൈൻ മരങ്ങൾ, മൊട്ടക്കുന്നുകൾ എന്നിവയും അതോടൊപ്പം നല്ല തണുത്ത കാലാവസ്ഥയുമാണ് വാഗമണിലേക്ക് സഞ്ചാരികളെ ആകർഷിക്കുന്ന പ്രധാന ഘടകങ്ങൾ.

ഇവിടേക്കുള്ള യാത്രയും അതിമനോഹരമാണ്. കോട്ടയം, പാലാ, ഈരാറ്റുപേട്ട, തൊടുപുഴ എന്നിവിടങ്ങളിൽ നിന്നും വാഗമണിലേക്ക് കെഎസ്ആർടിസി ബസ്സുകൾ സർവ്വീസ് നടത്തുന്നുണ്ട്.

ഇല്ലിക്കൽ കല്ല്

കോട്ടയം ജില്ലയിലെ ഏറ്റവും ഉയരമുള്ള കൊടുമുടിയാണ് ഇല്ലിക്കൽകല്ല്. അധികമാർക്കും അറിയാതെ കിടന്നിരുന്ന ഈ സ്ഥലം പ്രശസ്തമാക്കിയത് സോഷ്യൽ മീഡിയയിലെ ട്രാവൽ ഗ്രൂപ്പുകളാണ്. ഈ കൊടുമുടി ഈരാറ്റുപേട്ടയ്ക്കടുത്ത് തലനാട് പഞ്ചായത്തിലാണ് സ്ഥിതി ചെയ്യുന്നത്.

4000 അടി ഉയരമുള്ള ഇല്ലിക്കൽ കല്ല് മൂന്നു പാറക്കൂട്ടങ്ങൾചേർന്നാണുണ്ടായിരിക്കുന്നത്. ഇതിലെ ഏറ്റവും ഉയരം കൂടിയ പാറ ‘കൂടക്കല്ല്’ എന്നും തൊട്ടടുത്ത് സർപ്പാകൃതിയിൽ കാണപ്പെടുന്ന പാറ ‘കൂനൻ കല്ല്’ എന്നും അറിയപ്പെടുന്നു. ഇവയ്ക്കിടയിലായി 20 അടി താഴ്ചയിൽ വലിയൊരു വിടവുണ്ട്. ഈ കല്ലിൽ അരയടി മാത്രം വീതിയുള്ള ‘നരകപാലം’ എന്ന ഭാഗമുണ്ട്.

ഇല്ലിക്കൽ കല്ലിനു മുകളിൽ നീലക്കൊടുവേലി ഉണ്ടെന്ന് പ്രാദേശികമായി ഒരു വിശ്വാസമുണ്ട്. മുകളിൽ നിന്നും അറബിക്കടലും അവിടുത്തെ ഉദയം/അസ്തമയവും കാണാൻ കഴിയും. തലനാട് വഴിയും അയ്യമ്പാറ വഴിയും ഇല്ലിക്കൽകല്ലിലെത്താം.

കട്ടിക്കയം വെള്ളച്ചാട്ടം

കോട്ടയം ജില്ലയിൽ ഈരാറ്റുപേട്ടയ്ക്ക് സമീപമാണ് അധികം പ്രശസ്തി നേടാത്ത ഈ വെള്ളച്ചാട്ടം.ഇല്ലിക്കൽ കല്ല് എന്ന പ്രശസ്തമായ സ്ഥലത്തു നിന്നും വെറും 10 കിലോമീറ്റർ മാത്രമാണ് കട്ടിക്കയം വെള്ളച്ചാട്ടത്തിലേക്കുള്ള ദൂരം.

ഇടതൂർന്ന മരങ്ങളും കുന്നിൻ ചെരിവുകളും ഒക്കെ കടന്നാണ് ഈ വെള്ളച്ചാട്ടത്തിലേക്ക് എത്തുന്നത്. തൊടുപുഴ-മുട്ടം-മേലുകാവ്-മേച്ചാൽ-ഇല്ലിക്കൽ കല്ല് -കട്ടിക്കയം എന്നതാണ് റൂട്ട്.

കുമരകം

ലോക വിനോദസഞ്ചാര ഭൂപടത്തിൽ തന്നെ സ്ഥാനം പിടിച്ചിട്ടുള്ള കോട്ടയം ജില്ലയിലെ പ്രധാന വിനോദ സഞ്ചാര കേന്ദ്രമാണ് കുമരകം. വേമ്പനാട്ട് കായലിന്‍റെ തീരത്തായി ഉള്ള ചെറിയ ദ്വീപുകളുടെ സമൂഹമാണ് കുമരകം. ഹൗസ് ബോട്ടുകളിലൂടെയുള്ള കായൽ യാത്രകൾക്ക് ആലപ്പുഴയോളം തന്നെ പേരുകേട്ട സ്ഥലമാണ് കുമരകവും.

മനോഹരങ്ങളായ കാഴ്ചകൾക്കൊപ്പം മീൻ, ഞണ്ട്, ചെമ്മീൻ തുടങ്ങിയ രുചിയേറുന്ന കായൽ വിഭവങ്ങളും ഇവിടെ വരുന്നവർക്ക് ആസ്വദിക്കാം. റിസോര്‍ട്ടുകള്‍, ഹോട്ടലുകള്‍,ഹോംസ്റ്റേകള്‍ തുടങ്ങിയവക്കൊപ്പം ശുദ്ധമായ അന്തിക്കള്ള് ലഭിക്കുന്ന ഷാപ്പുകളിലും വരെ ഭക്ഷണപ്രിയര്‍ ഈ ഭക്ഷണങ്ങള്‍ തേടിയത്തൊറുണ്ട്. ദേശാടനക്കിളികൾ വരെ അതിഥികളായി എത്തുന്ന കുമരകം പക്ഷി സങ്കേതവും ഇവിടെ കാണേണ്ട കാഴ്ചകളിൽ ഒന്നാണ്.

വൈക്കം
എറണാകുളം-ആലപ്പുഴ ജില്ലകളോട് അടുത്തു കിടക്കുന്ന കോട്ടയത്തെ ഒരു പ്രദേശമാണ് വൈക്കം. വൈക്കം മഹാദേവ ക്ഷേത്രമാണ് ഇവിടത്തെ പ്രധാന ആകർഷണം.

നിരവധി ചരിത്ര സംഭവങ്ങൾക്ക് സാക്ഷിയായ വൈക്കം, വിശ്വപ്രസിദ്ധമായ വൈക്കത്തഷ്ടമി ഇവിടുത്തെ മഹാദേവ ക്ഷേത്രത്തിലാണ് നടക്കുന്നത്.ആലപ്പുഴ, കുമരകം എന്നീ സ്ഥലങ്ങൾ പോലെ തന്നെ വൈക്കവും കായൽ യാത്രകൾക്ക് പേരുകേട്ടതാണ്.

മാർമല അരുവി വെള്ളചാട്ടം

കോട്ടയം ജില്ലയിലെ ഈരാറ്റുപേട്ടക്ക് സമീപം തീക്കോയി ഗ്രാമപഞ്ചായത്തിൽ സ്ഥിതി ചെയ്യുന്ന ഒരു വെള്ളച്ചാട്ടമാണ് മാർമല അരുവി വെള്ളച്ചാട്ടം. മീനച്ചിലാറിന്‍റെ കൈവഴിയായ വഴിക്കടവാറിന്‍റെ ഭാഗമായ അരുവിയിലാണ് ഈ വെള്ളച്ചാട്ടം. കോട്ടയത്തെ ഏറ്റവും ഉയരമുള്ള വെള്ളച്ചാട്ടമാണ് ഇത്.

വർഷകാലത്ത് ശക്തമായ ഒഴുക്കായതു കാരണം അരുവിയിലും വെള്ളച്ചാട്ടത്തിലും പ്രവേശിക്കാനാവില്ല. വിനോദസഞ്ചാരികൾ ധാരാളമായി എത്താറുള്ള ഇല്ലിക്കൽ മലനിരകളും ഇല്ലിക്കൽകല്ലും ഇതിനടുത്താണ്.

ഈരാറ്റുപേട്ടയിൽ നിന്ന് പത്തുകിലോമീറ്റർ ദൂരമാണ് മാർമല അരുവിയിലേയ്ക്കുള്ളത്. തീക്കോയിയിൽ നിന്ന് മംഗളഗിരി വഴിയും അടുക്കത്തു നിന്ന് വെള്ളാനി വഴിയും മാർമല അരുവിയിൽ എത്താം.

ഭരണങ്ങാനം തീർത്ഥാടന കേന്ദ്രം

കോട്ടയം ജില്ലയിലെ പാലായ്ക്ക് അടുത്തുള്ള പ്രസിദ്ധമായ ഒരു സ്ഥലമാണ് ഭരണങ്ങാനം.വിശുദ്ധ അൽഫോൻസാമ്മയുടെ തിരുശേഷിപ്പുകൾ സൂക്ഷിച്ചിരിക്കുന്നത് സെന്‍റെ മേരീസ് പള്ളിയോടു ചേർന്നുള്ള ഒരു ചെറിയ പള്ളിയിൽ ആണ്.

അതിനാൽ ഇവിടം ഒരു തീർത്ഥാടന കേന്ദ്രമായി അറിയപ്പെടുന്നു. ഇതുവഴി വാഗമൺ പോകുന്നവർക്ക്ഭരണങ്ങാനം പള്ളി കൂടി സന്ദർശിക്കാവുന്നതാണ്.

മാംഗോ മെഡോസ്

ലോകത്തിലെ ആദ്യത്തെ അഗ്രിക്കള്‍ച്ചറല്‍ തീംപാര്‍ക്ക് കോട്ടയത്തെ കടുത്തുരുത്തിക്കു സമീപമുള്ള മാംഗോ മെഡോസ് തന്നെയാണ്. ഏകദേശം 120 കോടി രൂപയോളം ചെലവഴിച്ചാണ് ഈ പാര്‍ക്ക് ഇവിടെ നിര്‍മ്മിച്ചിരിക്കുന്നത്.

കുട്ടികള്‍ക്കും മുതിര്‍ന്നവര്‍ക്കും ഒരുപോലെ ആസ്വദിക്കുവാന്‍ പറ്റിയ തരത്തിലാണ് പാര്‍ക്കിന്‍റെ നിര്‍മ്മാണം.

നാലായിരത്തിലേറെ ഇനം അപൂർവ മരങ്ങൾ ഇവിടെയുണ്ട് എന്നതാണ് മറ്റൊരു പ്രത്യേകത. . പ്രകൃതിയെയും സസ്യജാലങ്ങളെയും ഒരേപോലെ സ്നേഹിക്കുന്നവര്‍ക്കും ആസ്വദിക്കുന്നവര്‍ക്കും വേണ്ടിയുള്ളതാണ് മാംഗോ മെഡോസ് എന്ന ഈ മഹാപ്രപഞ്ചം.

നീണ്ടൂർ ഫാം.

അപ്പർ കുട്ടനാടിന്‍റെ ഭംഗി വാനോളം ആസ്വദിക്കാൻ നീണ്ടൂർ ഫാം അവസരം നൽകുന്നു.. ഒരു പ്രൈവറ്റ് ഫാം ആയിട്ടു കൂടി തികച്ചും സൗജന്യം ആണ് പ്രവേശനം. ബോട്ടിങ്ങിനും, ഫുഡിനും പണം നൽകണം.. ഫാം ടുറിസത്തിന്‍റെ എല്ലാ ആധുനിക സാധ്യതകളും ഉൾപ്പെടുത്തിയാണ്ഈ ഫാം പ്രവർത്തിക്കുന്നത്.

വിവിധ ഇനം പശുക്കൾ, കോഴികൾ, പറവകൾ, മീനുകൾ, എമു പക്ഷി, കാട, കോവർ കഴുത, തുടങ്ങിയ വളർത്തു മൃഗങ്ങളുടെ നീണ്ട നിര തന്നെയുണ്ട് ഇവിടെ.

നോക്കാത്ത ദൂരത്തു പരന്നു കിടക്കുന്ന പാടശേഖരങ്ങൾ, പായൽ പച്ച പുതപ്പിച്ച തടാകങ്ങൾ, കരിമീനും വാളയും വിളയുന്ന കുളങ്ങൾ, വരമ്പത്തു നിലയുറച്ച കുള്ളൻ തെങ്ങുകൾ തുടങ്ങിയ കാഴ്ചകൾ ആസ്വദിക്കാം. കുട്ടികൾക്കായുള്ള ഒരു പാർക്കും, വാച്ച് ടവറും ഒരുക്കിട്ടുണ്ട്

അരുവികുഴി വെള്ളച്ചാട്ടം

കോട്ടയം ജില്ലയിലെ പള്ളിക്കതോടിന് അടുത്ത് സ്ഥിതി ചെയുന്ന വെള്ളച്ചാട്ടമാണ് അരുവികുഴി. മനോഹരമായ ഈ വെള്ളച്ചാട്ടത്തിൽ ഇറങ്ങുകയും കുളിക്കുകയും ചെയ്യാവുന്നതാണ്.

നാലുമണികാറ്റ്

റോഡിനു ഇരു വശങ്ങളിലും വിശാലമായ പാടശേഖരങ്ങൾ അവിടെ ഒരു വിശ്രമ കേന്ദ്രം അതാണ് നാലുമണികാറ്റ് . വൈകുന്നേരങ്ങളിലെ പാടശേഖരങ്ങളിൽ നിന്നുമുള്ള കാറ്റുമേറ്റുകൊണ്ട്. വിശ്രമിക്കാവുന്ന ഇരിപ്പിടങ്ങളും, ഊഞ്ഞാലുകളും ഇതാണ് നാലുമണിക്കാറ്റിലെ വിശേഷങ്ങൾ. ഒട്ടുമിക്ക യാത്രികരും വണ്ടി നിർത്തി വിശ്രമിക്കുന്ന സ്ഥലം.

കുട്ടികൾക്കായി ചെറിയ പാർക്കും നാലുമണികാറ്റിൽ ഒരുക്കിട്ടുണ്ട്.ഒരു വലിയ ചുണ്ടൻ വള്ളത്തിന്‍റെ രൂപം ഇവിടെ നിർമിച്ചു വെച്ചിട്ടുണ്ട്.

ഇനിയും ഒട്ടനവധി ചെറുതും വലുതുമായ വിനോദസഞ്ചാര കേന്ദ്രങ്ങൾ കോട്ടയം ജില്ലയിലുണ്ട്. യാത്രയെയും പ്രകൃതി സൗന്ദര്യം ആസ്വദിക്കുന്നവർക്കും കോട്ടയം ജില്ലയിലെ പ്രകൃതി സുന്ദരമായ സ്ഥലങ്ങൾ  വ്യത്യസ്തമായ ഒരു അനുഭവം നൽകുമെന്നു തീർച്ചയായും പറയാം.

The post പ്രകൃതി സൗന്ദര്യം ആസ്വദിച്ചു യാത്രചെയ്യാം കോട്ടയം ജില്ലയിലൂടെ… appeared first on top1kerala.

സപ്പോട്ടേസിയേ (Sapotaceae) കുടുംബത്തിൽപ്പെട്ട ഈ ചെടിയുടെ ശാസ്ത്രനാമം സിൻസെപാലം ഡൾസിഫൈക്കം. നമ്മുടെ മണ്ണും കാലാവസ്ഥയും മറ്റു സാഹചര്യങ്ങളുമെല്ലാം ഈ ചെടിയുടെ വളർച്ചയ്‌ക്ക് അനുയോജ്യമാണ്. വിത്തുവഴിയാണ് പ്രധാനമായും വംശവർധന.

വിത്ത് തൈകൾ എളുപ്പം തയ്യാറാക്കാം. വിത്തിന് കാലപ്പഴക്കം കുടുംതോറും കിളിർക്കാനുള്ള ശേഷി നഷ്ടപ്പെടും. പുതിയ വിത്ത് മണ്ണിലോ മണ്ണ് നിറച്ച പോളിത്തീൻ ബാഗിലോ നട്ട് തൈകളാക്കാം. നാലഞ്ച് ഇല പ്രായമായാൽ സ്ഥിരമായ സ്ഥലത്തേക്ക് മാറ്റി നടാം.

വലുപ്പമുള്ള ചട്ടികളിലും ഇവയെ വളർത്താനാകും. ഭാഗികമായ സൂര്യപ്രകാശത്തിലും ചെടി നന്നായി വളരും.കുറ്റിച്ചെടിയായാണ് വളരുക. പരമാവധി പത്തടിവരെ ഉയരത്തിൽ വളരും. തൈ നട്ട് മൂന്നാം വർഷംതന്നെ ഫലം തരും.

നമ്മുടെ കാലാവസ്ഥയിൽ എല്ലാക്കാലത്തും ഇത് പൂക്കുകയും കായ്ക്കുകയും ചെയ്യും. വെള്ളനിറത്തിലുള്ള പൂക്കൾക്ക് നേരിയ സുഗന്ധവുമുണ്ട്. പച്ചനിറത്തിലുള്ള കായ്കൾ പഴുക്കുന്നതോടെ ചുവപ്പ് നിറമാകും. കായ്കളിൽ ഓരോ വിത്ത്‌ കാണും.

വിത്തൊഴിച്ചുള്ള മാംസളമായ പുറംഭാഗമാണ് ഭക്ഷ്യയോഗ്യമായത്. ഇതിലുള്ള മിറാക്കുലിൻ എന്ന രാസപദാർഥം പഞ്ചസാരയ്‌ക്ക് തുല്യം മധുരം നൽകുന്നു. എന്നാൽ, പഞ്ചസാര കഴിച്ചാലുണ്ടാകുന്ന പ്രശ്നങ്ങളൊന്നും ഇത് കഴിക്കുകവഴി ഉണ്ടാക്കുകയുമില്ല. കാരണം, ഇതൊരു ഗ്ലായിക്കോ പ്രോട്ടീൻ (Glyco protein) ആണ്.

മിറാക്കിൾ ഫ്രൂട്ടിലടങ്ങിയ ‘മിറാക്കുലിൻ’ എന്ന പ്രോട്ടീൻ ഘടകം നാവിലെ മധുരം പ്രദാനം ചെയ്യുന്ന രസമുകുളങ്ങളെ ഉണർത്തുകയും ഒപ്പം പുളി, കയ്പ് എന്നിവയ്‌ക്കുള്ള ഗ്രന്ഥികളെ താൽക്കാലികമായി നിർവീര്യമാക്കുകയും ചെയ്യുന്നു.പ്രമേഹരോഗികൾക്ക് ഇതിന്‍റെ പഴം കഴിക്കുന്നത് തുടർന്ന് കഴിക്കുന്ന ഭക്ഷണത്തെ മധുരകരമാക്കാനാകും.

ഇന്ന് പല രാജ്യങ്ങളും മിറാക്കിൾ ഫ്രൂട്ട് വാണിജ്യാടിസ്ഥാനത്തിൽ കൃഷി ചെയ്ത് മിറാക്കുലിൻ അടങ്ങിയ ഉൽപ്പന്നങ്ങൾ വിപണിയിലിറക്കുകയും ചെയ്യുന്നു. മധുരപലഹാരങ്ങളിലും മിറാക്കിൾ ഫ്രൂട്ട് ഉപയോഗിച്ചുവരുന്നു. എന്തായാലും ഈ കുഞ്ഞൻ ഫലത്തെക്കുറിച്ച് കൂടുതൽ പഠനം ആവശ്യമാണ്

The post അതിഥിയായെത്തിയ ആഫ്രിക്കൻ സ്വദേശി മിറാക്കിൾ ഫ്രൂട്ട് appeared first on top1kerala.

കാലക്രമേണ കേടുപാടുകൾ തീർക്കുവാനുള്ള സൗകര്യക്കുറവും വില കുറഞ്ഞ വിവിധ ലോഹ,പ്ലാസ്റ്റിക് ടാപ്പുകളുടെ കടന്നുവരവോടെ ഇത്തരം ടാപ്പുകൾ അപ്രത്യക്ഷമായി. ജെ. പി. സുബ്രഹ്മണ്യ അയ്യർ എന്ന മലയാളിയാണ് ഈ ടാപ്പ് വികസിപ്പിച്ചെടുത്തത്.

ജെ. പി. സുബ്രഹ്മണ്യ അയ്യർ തിരുവിതാംകൂർ-കൊച്ചി സംസ്ഥാനത്ത് ഇൻഷുറൻസ് ഓഫീസറായി സേവനമനുഷ്ഠിച്ച കാലത്ത് റോഡ് സൈഡിൽ വാട്ടർ ടാപ്പുകൾ ഉപയോഗശേഷം ആളുകൾ കൃത്യമായി അടക്കാത്തത് മൂലം ധാരാളം വെള്ളം പാഴായിപ്പോകുന്നത് അദ്ദേഹത്തിന്‍റെ ശ്രദ്ധയിൽപ്പെട്ടിരുന്നു.

ഈ പ്രശ്നം എങ്ങനെ പരിഹരിക്കാമെന്ന് നിരന്തരം ചിന്തിച്ചു കൊണ്ടിരുന്ന അദ്ദേഹം ചില എഞ്ചിനീയർ സുഹൃത്തുക്കളുടെ സഹായത്തോടെ ഒരു ടാപ്പ് ഉണ്ടാക്കി. പിന്നീട് ടാപ്പുകളുടെ പ്രവർത്തനക്ഷമത കൂടുതൽ മെച്ചപ്പെടുത്തുകയും ഈ ടാപ്പ് ഡിസൈന് പേറ്റന്റ്നേടുകയും ചെയ്തു.

പിന്നീട് സുബ്രഹ്മണ്യ അയ്യർ കരമനയിൽ ഒരു ഫാക്ടറി സ്ഥാപിച്ച് വൻതോതിൽ ടാപ്പ് നിർമ്മാണം ആരംഭിച്ചു. പിന്നീട് അദ്ദേഹം നിർമ്മാണശാല കോയമ്പത്തൂരിലേക്ക് മാറ്റി.

‘ഹൈഡ്രോ പ്ലാൻ’ എന്ന ഒരു ജർമ്മൻ കമ്പനി ഇന്ത്യയിലും ശ്രീലങ്കയിലും ഒഴികെ ലോകമെമ്പാടും ടാപ്പ് നിർമ്മിക്കാനും വിൽക്കാനുമുള്ള അവകാശം അയ്യരുടെ കയ്യിൽ നിന്ന് വാങ്ങിയതോടെ യൂറോപ്പ്, ഇംഗ്ലണ്ട്, ജപ്പാൻ തുടങ്ങി ലോകത്തിന്‍റെ വിവിധ ഭാഗങ്ങളിൽ ജെയ്‌സൺ ടാപ്പിന് പ്രചാരമുണ്ടായി.

ജീവിത രീതിയിലെ വ്യത്യാസവും വീടുകളിലേക്കുള്ള ജലവിതരണവും കുപ്പികളിൽ വരുന്ന കുടിവെള്ളത്തിന്‍റെ സ്വീകാര്യതയും റോഡുകളിലെ പൊതുടാപ്പുകളുടെ എണ്ണത്തിൽ കുറവുകൾ വരുത്തി.അപൂർവ്വമായുള്ള പൊതുടാപ്പുകളും ജെയ്‌സൺ ടാപ്പുകൾ ഉപയോഗിക്കാതായി.

എന്നിരുന്നാലും ട്രെയിനുകൾക്കുള്ളിലും സ്റ്റേഷനുകളിലും ഇന്ത്യൻ റെയിൽ‌വേ ഇപ്പോഴും ജെയ്‌സൺ വാട്ടർ ടാപ്പുകൾ ഉപയോഗിക്കുന്നുണ്ട്.ചെറിയ തരം സ്റ്റീൽ ജെയ്സൺ ടാപ്പുകൾ ഇപ്പോൾ വിപണിയിൽ ലഭ്യമാണ്.

The post മൺമറഞ്ഞുപോയ ജെയ്‌സൺ വാട്ടർ ടാപ്പ് appeared first on top1kerala.

ഒരു ക്ഷേത്രങ്ങളിലോ കാവുകളിലോ കെട്ടിയാടുന്നതിനു പകരമായി ഈ തെയ്യം ഓരോ വീടുകളിലും കയറി ഇറങ്ങുന്നു.

പാർവ്വതിയും പരമേശ്വരനുമാണ്‌ ഈ തെയ്യങ്ങളുടെ അടിസ്ഥാനം. കർക്കടക സംക്രമം മുതൽ ആടി വേടന്മാർ ആരംഭിക്കും. ആടി എന്ന പാർവ്വതി വേഷം കെട്ടുന്നത് വണ്ണാൻ സമുദായത്തിലെ കുട്ടികളും, വേടൻ എന്ന ശിവവേഷം കെട്ടുന്നത് മലയൻ സമുദായത്തിലെ കുട്ടികളുമാണ്‌. വേടൻ ആണ്‌ ആദ്യം വരുന്നത്.

മാസത്തിന്റെ പകുതി ആകുമ്പോഴേക്കും ആടിയും വരും.. കോലക്കാരുടെ വീടുകളിൽ നിന്ന് കെട്ടിപ്പുറപ്പെടുന്ന ആടി വേടന്മാർക്ക് യാത്രാവേളയിൽ അകമ്പടിയായി ചെണ്ട കൊട്ടാറില്ല.

വീട്ടു പടിക്കൽ എത്തുമ്പോൾ മാത്രമേ ചെണ്ടകൊട്ടൽ ആരംഭിക്കുകയുള്ളൂ. ഒറ്റ ചെണ്ട മാത്രമേ ആടിവേടന്മാർക്ക് സാധാരണ ഉണ്ടാകാറുള്ളൂ.

ചടങ്ങുകൾ

കർക്കടകം 7 മുതൽ മലയന്‍റെ വേടനും 16 മുതൽ വണ്ണാന്‍റെ ആടിവേറ്റനും ഗൃഹ സന്ദർശനം നടത്തുന്നു.ഒരോ ദേശത്തെയും ജന്മാരി കുടുംബത്തിനാണു വേടൻ കെട്ടാൻ അനുവാദം.

ഒരാൾ വേടന്‍റെ പുരാവൃത്തം പാടുമ്പോൾ വേടൻ മുറ്റത്തു നിന്ന് മന്ദം മന്ദം മുന്നോട്ടും പിന്നോട്ടുംനടനം ചെയ്യും.വീട്ടമ്മ പടിഞ്ഞാറ്റയിൽ വിളക്ക് കത്തിച്ച് വച്ചു കഴിഞ്ഞാൽ പാട്ട് തുടങ്ങുകയായി.

രണ്ടു വേടന്മാരുടെയും പുരാവൃത്തം പാശുപതാസ്ത്ര കഥയാണ്.തപസ്സ് ചെയ്യുന്ന അർജ്ജുനനെ പരീക്ഷിക്കാൻ ശിവനും പാർവ്വതിയും വേട രൂപത്തിൽ പോകുന്ന പുരാണ കഥ. ചേട്ടയെ അകറ്റുന്നത് ഈ തെയ്യങ്ങളാണ്‌.

വീടും പരിസരവും ചാണകം തെളിച്ച് ആടിവേടന്മാർ വരുന്നതിനു മുൻപേ ശുദ്ധീകരിച്ചിരിക്കും.

പാട്ട് പാടിപ്പൊലിക്കുമ്പോൾ മലയന്‍റെ വേടനാണെങ്കിൽ കിണ്ണത്തിൽ കലക്കിയ കറുത്ത ഗുരുതി തെക്കോട്ടും,വണ്ണാന്‍റെ വേടനാണെങ്കിൽ ചുവന്ന ഗുരുതി വടക്കോട്ടും ഉഴിഞ്ഞ് മറിക്കുന്നു .കരിക്കട്ട കലക്കിയതാണു കറുത്ത ഗുരുതി,മഞ്ഞളും ചുണ്ണാമ്പും കലക്കിയതാണു ചുവന്ന ഗുരുതി. ഗുരുതി കലക്കി ഉഴിഞ്ഞു മറിക്കുന്നതോടെ വീടും പരിസരവും പരിശുദ്ധമായി എന്നാണ്‌ വിശ്വാസം.

ആടിവേടന്മാരെ വരവേൽക്കാൻ നിറപറയും, നിലവിളക്കും വെച്ചിരിക്കും. കൂടാതെ മുറത്തിൽ അരി, പച്ചക്കറി, ധാന്യങ്ങൾ, ഉപ്പിലിട്ടത് തുടങ്ങിയ സാധനങ്ങളും വെച്ചിട്ടുണ്ടാകും.

ഈ സാധനങ്ങളൊക്കെ വേടനും കൂട്ടർക്കുമുള്ളതാണ്.വെക്കേണ്ട കാഴ്ചവസ്തുക്കളുടെ പട്ടിക പാട്ടിലുണ്ടാകും.

പിനീട് ഈ കാഴ്ചവസ്തുക്കളെല്ലാം തുണി മാറാപ്പിൽ ഇട്ട് അടുത്ത വീട്ടിലേക്ക് വേടൻ യാത്രയാകും. കൂടാതെ നെല്ലോ, പണമോ കൂടെ വീട്ടുടമസ്ഥർ അവർക്കു നൽകും.പഞ്ഞമാസമായ കർക്കിടകത്തിൽ ഭക്ഷണത്തിനുള്ള വക ഇങ്ങനെ അവർക്ക് ലഭിക്കുന്നു.

  ഉത്തര മലബാറിലെ ഗ്രാമീണ കർഷകരുടെ ജീവിതവുമായി ബന്ധപ്പെട്ട ആചാരമാണ് വേടൻ കെട്ടിയാടൽ.ദിവസങ്ങളോളം സ്കൂളിൽ പോവാതെ വേടൻ കെട്ടാൻ കുട്ടികളെ കിട്ടാതായതും,വിശ്വാസത്തിലുണ്ടായ കുറവും,ഈ ആചാരത്തെ വിസ്മൃതിയിലേക്ക് കൊണ്ടു പോയി കഴിഞ്ഞു.

 എങ്കിലും ചിലയിടങ്ങളിൽ ഇന്നും അവശേഷിക്കുന്നണ്ട്. പുതുമഴ പെയ്ത മണ്ണിൽ വിത്തിട്ട്, നട്ടുവളർത്തിയ വിളകൾ വളർന്ന് പൂവിട്ട് കായ്ച്ചതിനുശേഷം, വിളവെടുപ്പിന് പാകമാവുന്നതിന്‍റെ ഇടവേളയിൽ, മുറ്റത്തെ പെരുമഴയും നോക്കി വിശപ്പകറ്റാനായി ചക്കക്കുരു ചുട്ട്‌തിന്ന് വീട്ടിലിരിക്കുന്ന ഗ്രാമീണ കർഷകന്‍റെവീടുകൾ‌തോറും, ചെണ്ടകൊട്ടിയുള്ള വേടന്‍റെ വരവ് ഒരു പുത്തനുണർവ്വ് പകരുന്നു.

കർക്കിടകത്തിലെ രോഗപീഡകൾ അകറ്റാനായുള്ള ഈ വേടൻ കെട്ടിയാടൽ ഒരു പ്രത്യേക ജനവിഭാഗത്തിന്‍റെ മാത്രം അവകാശമാണ്. കാർഷികസംസ്കൃതിയുടെ ഭാഗമായ മേലാളർ-കീഴാളർ ബന്ധം ഉറപ്പിക്കുന്ന കാലത്ത് രൂപംകൊണ്ട, ഈ ആചാരം വളരെ നല്ലൊരു കലാരൂപമാണ്.

വേടൻ കെട്ടിയാടാൻ അവകാശമുള്ളവർ മറ്റുതൊഴിലുകൾ തേടുകയും ഗ്രാമീണർക്ക് കൃഷി അന്യമാവുകയും ഗ്രാമം പട്ടണങ്ങളുടെ വികലമായ രൂപം പ്രാപിക്കുകയും ചെയ്തതോടെ ഇതുപോലുള്ള ആചാരങ്ങൾക്കെല്ലാം വംശനാശം സംഭവിക്കുകയാണ്.

കർക്കിടകമാസം വീടുകൾ‌തോറും കയറിയിറങ്ങുന്നവരാണ് ‘വേടനും ആടിയും’. ഒന്നിച്ച് ‘ആടിവേടൻ’ എന്ന് പറയുന്നുണ്ടെങ്കിലും ‘വേടൻ’ മലയ സമുദായക്കാരും ‘ആടി’ വണ്ണാൻ സമുദായക്കാരും കർക്കിടകത്തിലെ വ്യത്യസ്ത ദിവസങ്ങളിലായി കെട്ടിയാടുന്നു.

അതുപോലെ ‘കോതാമ്മൂരി, ഉച്ചാരപൊട്ടൻ’ എന്നീ ആചാര കലാരൂപങ്ങൾ പണ്ട് കാലത്ത് വടക്കൻ കേരളത്തിൽ ഉണ്ടായിരുന്നു. വീട്ടിൽ വരുന്ന വേടൻ, മുഖത്തും ദേഹത്തും ചായം‌പൂശിയിട്ട് തിളങ്ങുന്ന കിരീടവും ചുവന്ന ആടയാഭരണങ്ങളും ധരിച്ചിരിക്കും.

മുതിർന്ന പുരുഷനോടൊപ്പം ചെണ്ടമുട്ടിന്‍റെ അകമ്പടിയോടെ വീടിന്‍റെ മുറ്റത്ത് കടന്നുവരുന്ന വേടൻ സംസാരിക്കില്ല. വേടന്‍റെ വേഷമണിഞ്ഞ കുട്ടിയോടൊപ്പം ചെണ്ടക്കാരൻ കൂടാതെ ഒന്നോ രണ്ടോ സഹായികളും കാണും.

വീട്ടിലെത്തിയാൽ കത്തിച്ച വിളക്കിനെയും ആവണിപ്പലകയിൽ അരി നിറച്ച നിറനാഴിയെയും വണങ്ങി വേടനെ മുന്നിൽ നിർത്തിക്കൊണ്ട്, ചെണ്ടകൊട്ടി പാട്ടുപാടുന്നു. തപസ്സുചെയ്യുന്ന അർജ്ജുനനെ പരീക്ഷിക്കാനായി വേടന്‍റെ രൂപത്തിൽ വന്ന പരമശിവന്റെ കഥയാണ് പാട്ടിലുള്ളത്.

ഐതിഹ്യം.

മഹാഭാരതം വനപർവ്വത്തിൽ പറയുന്ന ഈ കഥ പാണ്ഡവരുടെ വനവാസകാലത്ത് സംഭവിച്ചതാണ്. തപസ്സു ചെയ്യുന്ന അർജ്ജുനനെ പരീക്ഷിക്കാനായി പരമശിവൻ വേടനായും പാർവ്വതി വേടത്തിയായും ഭൂതഗണങ്ങൾ അനുചരന്മാരുമായി വെഷംമാറി കാട്ടിലൂടെ നടക്കുമ്പോൾ, മൂകൻ എന്ന അസുരൻ ഒരു കാട്ടുപന്നിയുടെ രൂപത്തിൽ അർജ്ജുനനെ ആക്രമിക്കാൻ മുന്നിലെത്തി.

അവിടെയെത്തിയ ശിവനും, അർജ്ജുനനും ഒരേസമയം അമ്പെയ്തതോടെ കാട്ടുപന്നിയായ മൂകാസുരൻ മരിച്ച് അസുരരൂപത്തിലായി മാറുന്നു. തുടർന്ന് പന്നിയെ(അസുരനെ) കൊന്നതിന്‍റെ അവകാശത്തർക്കമായി. അവർ തമ്മിലുള്ള യുദ്ധത്തിൽ വേടന്‍റെ ദേഹത്ത് അമ്പ് കൊള്ളാത്തതിൽ മനം‌നൊന്ത അർജ്ജുൻ, തന്‍റെ മുന്നിൽ വന്നത് സാക്ഷാൽ പരമശിവനാണെന്ന് തിരിച്ചറിഞ്ഞ് മാപ്പ്‌ചോദിച്ച് സ്തുതിക്കുന്നു. തുടർന്ന് അർജ്ജുനന് പാശുപതാസ്ത്രം നൽകി പരമശിവൻ അനുഗ്രഹിക്കുന്നു

The post കർക്കിടകത്തിലെ ആധികളും വ്യാധികളും അകറ്റാൻ ആടിവേടൻ appeared first on top1kerala.